Hoti për 1 maj, kritikon qeverinë: Nuk rriti pagat pavarësisht inflacionit në vend, ligji për pagat vetëm krijoi probleme e ligji për pagën minimale u “harrua”.

Duke akuzuar qeverinë aktuale se nuk bëri asgjë për punëtorët, ish-kryeministri i Kosovës, Avdullah Hoti, ka ndarë një shkrim në llogarinë e tij në Facebook, ku ka radhitur 4 nga vërejtjet e tij.

Sipas Hotit Qeveria nuk rriti paga pavarësisht inflacionit në vend, ligji për pagat sipas tij vetëm krijoi probleme e ligji për pagën minimale u “harrua”.

“Pagat nuk u rritën në vitin me inflacionin më të lartë në 15 vitet e fundit, përkundrazi. Bazuar në raportin e buxhetit për 2022, shpenzimet totale për paga të 85 mijë punëtorëve të sektorit publik  (që janë 1/4 e punëtorëve në nivel vendi) pësuan rënie me 3% krahasuar me vitin paraprak”.

Ndërsa për ligjin e pagave në sektorin publik, Hoti tha se më shumë krijoi sesa që zgjidhi problemin.

“Ky ligj krijoi pasiguri pasi uli ndjeshëm pagat në veçanti në institucionet e pavarura dhe për profesionet e rralla në treg (ekspertët e teknologjisë së informacionit, inxhinierët e ndryshëm etj.). Për shkak që është shtyrë miratimi i tij pa asnjë arsye, ishte vonë për tu buxhetuar në mënyrë të rregullt në buxhetin e vitit 2023. Për shkak të mungesës së konsultimeve me sindikatat, shumë të punësuar mbetën të pakënaqur dhe ligji përfundoi në Gjykatë Kushtetuese”, ka shkruar Hoti në Facebook, për 1 maj, Ditës Ndërkombëtare të Punëtorëve.

Ai vlerëson se Ligji për pagën minimale, i cili do të ndikonte në rritjen e pagave të ulëta në sektorin privat, u miratua në lexim të parë në Kuvend para një viti, tani u harrua.

“Nga atëherë është harruar plotësisht, edhe pse ky ligj përbënte ‘reformën’ kryesore të mazhorancës së majtë në pushtet”.

Në anën tjetër, kujton Hoti, “pa asnjë konsideratë për gjendjen ekonomike, (i) u dyfishua tatimi në pronë për shumë qytetarë dhe biznese, si dhe (ii) dy herë u shtrenjtua energjia elektrike”.

“Pavarësisht se me subvencione po ndihmohen familjet që kursejnë energji, si dhe janë ndihmuar bizneset gjatë vitit 2022, në fund të fundit efekti makroekonomik është i njëjtë pasi po përdoren tatimet e qytetarëve për këto subvencione”.

Hoti vlerëson Hoti se do të mund të shkonin për të mira të tjera publike shumë më të nevojshme, “siç është arsimi dhe shëndetësia”.

“Sot, më 1 Maj, në Ditën Ndërkombëtare të Punëtorëve, shpreh mirënjohje për rolin dhe kontributin e secilit punëtor në shoqëri, duke u zotuar për krijimin e kushteve më të mira të punës, respektimin e plotë të të drejtave të tyre, paga dinjitoze dhe mundësi më të shumëta për të gjithë”, ka shkruar Memli Krasniqi, Kryetar i partisë Demokratike të Kosovës, në llogarinë e tij në Facebook.

Krasniqi, ka thënë se shteti i Kosovës ende nuk ka arritur të ofrojë trajtim meritor për çdo punëtor në cilindo sektor që punon.

“Si shtet e si shoqëri ende s’kemi arritur që të sigurojmë trajtimin meritor për çdo punëtor, në cilindo sektor që punon. Për më shumë, sfidën e madhe të emigrimit masiv të të rinjve tanë që kërkojnë një perspektivë larg Kosovës, duhet ta tejkalojmë përmes angazhimit konkret në krijimin e një ambienti të favorshëm që ofron mundësi të barabarta, vende pune me paga konkurruese dhe vlerësim të drejtë për kontributin e punëtorëve”, ka shkruar Krasniqi.

“Paga minimale në Kosovë do të rritet në 250 euro”, kishte paralajmëruar zëvendëskryeministri, Besnik Bislimi, më 1 mars të vitit 2022.

“I kuptoj shqetësimet për pagën minimale. Modeli që keni hartuar është pothuajse 100% në përputhshmëri me objektivat e qeverisë. Mendojmë gjithashtu se paga minimale duhet të jetë rreth numrit magjik, 250 euro”.

Më 1 qershor të vitit 2022, Deputetët e Kuvendit të Kosovës, në seancën plenare të 14 qershorit, kanë votuar në parim Ligjin për pagën minimale. Ky ligj përveç të metave të tjera, la jashtë kategorinë e veteranëve të luftës nga Ushtria Çlirimtare e Kosovës.

Për herë të parë dhe të fundit, niveli i pagës minimale në Kosovë u caktua në vitin 2011. Në atë kohë u caktua që paga minimale të jetë nga 130-170 euro.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.