Lajme

Hetohet pronarja e cigareve elektronike në Kinë, bien aksionet e firmës


Një hetim ndaj pronares së firmës së cigareve elektronike, Chu Lam Yiu, bëri që aksionet e kompanisë së saj “Huabao International Holdings” të binin me mbi 65%.

Kjo erdhi si pasojë e politikës kundër korrupsionit që po ndërmerr presidenti i Kinës, Xi Jinping.

Chu, një nga gratë më të pasura në Kinë, me shumicën e aksioneve në kompaninë e lëngjeve dhe aromave të duhanit, po hetohet nga autoritetet për “shkelje të paspecifikuara disiplinore”.

Në një deklaratë të kompanisë thuhej se “ishte informuar për hetimin nga filiali i saj Huabao Flavors & Fragrances”.

“Deri në datën e këtij njoftimi, kompanisë nuk i është dhënë asnjë detaj për natyrën e shkeljeve të dyshuara të zonjës Chu, që po hetohet aktualisht. Funksionimi i biznesit të grupit mbetet normal”, tha zëdhënësi i kompanisë.

Ai shtoi se filiali e mori njoftimin nga Komiteti Mbikëqyrës i Qytetit Leiyang, duke treguar se hetimi po kryhej nga Partia Komuniste Kineze dhe qeveria lokale.

Huabao, të cilën Chu e lançoi në vitin 1996, kur ishte mes të 20-ave, prodhon shije dhe aroma të përdorura nga prodhuesit e duhanit, duke përfshirë tregun e cigareve elektronike, si dhe kompanitë ushqimore.

Rritja e kompanisë ka katapultuar Chu-në të renditet në mesin e njerëzve më të pasur të Kinës.

Sipas Hurun Report, i cili gjurmon vlerën neto të sipërmarrësve më të pasur të Kinës, Chu ka grumbulluar një pasuri prej 7.6 miliardë dollarësh që nga viti i kaluar, duke e renditur atë në vendin e 122-të.

Ashtu si shumë biznesmenë kinezë të profilit të lartë, ajo ka shërbyer gjithashtu në komitete të ndryshme këshillimore të industrisë dhe qeverisë.

Një seri hetimesh

Hetimi mbi Chu-në vjen ndërsa fushata e gjatë kundër korrupsionit e Kinës po merr vrull dhe Xi kërkon të sigurojë një mandat të tretë historik.

Sipas njoftimeve të lëshuara nga Komisioni Qendror për Inspektimin Disiplinor të Partisë Komuniste, hetimet për të paktën 27 zyrtarë dhe drejtues të nivelit të lartë janë shpallur që nga fillimi i tremujorit të katërt të vitit të kaluar.

Midis tyre janë ish-zyrtarë të bankës qendrore, të bankës shtetërore kineze, grupe nafte dhe sigurues.

Hetimi për Chu gjithashtu ndjek pritshmëritë që industria e duhanit në Kinë ndoshta do të goditet nga rregullime dhe mbikëqyrje më të ashpra, si pjesë e përpjekjes së “prosperitetit të përbashkët” të presidentit Xi.

Seria e goditjeve të politikave dhe rregullatorëve ndaj biznesit, kulturës dhe veseve gjatë vitit të kaluar ka fshirë miliarda dollarë nga vlera e kompanive kineze – dhe pasuria personale e shumë prej manjatëve të saj.

Investitorët më parë ishin optimistë për potencialin e Kinës, si tregu më i madh i cigareve elektrike në botë.

Por perspektiva është turbulluar nga raportet e medias shtetërore kineze për shitjen e gjerë të këtyre cigareve për të miturit, ndërkohë që zyrtarët mendojnë të vendosin tarifa më të larta në këtë sektor.

Marrë nga “The Financial Times”, përshtatur për Albanian Post!

/Albanianpost.com


Lajmet kryesore