Hehir e cilëson “kërcënim të zbrazët” deklaratën e Rohdes rreth “ngecjes në inbox” të aplikimit të Kosovës në BE

Aidan Hehir, ligjërues në Universitetin e Westminsterit në Londër të Britanisë së Madhe, ka reaguar përmes një postimi në “X” ndaj deklaratës së ambasadorit gjerman në Prishtinë, Jorn Rohde, duke e cilësuar “kërcënim të zbrazët” paralajmërimin se “veprimet e njëanshme” rrezikojnë ta lënë të bllokuar aplikimin e Kosovës për anëtarësim në Bashkimin Evropian (BE).

“Një kërcënim shumë i zbrazët. Aplikimi i Kosovës për anëtarësim në BE – padrejtësisht – ka ‘ngecur në inbox’ prej dekadave. Pavarësisht progresit që ka bërë dhe mbështetjes së madhe brenda vendit për anëtarësim, ajo nuk është as vend kandidat; zyrtarisht është vetëm një ‘kandidat potencial’”.

Kosova ka dorëzuar dokumentacionin për anëtarësim në BE në dhjetor të vitit 2022, por Këshilli i BE-së ende nuk e ka shqyrtuar. Dhe arsye për këtë janë kryesisht tensionet e vazhdueshme në marrëdhëniet Prishtinë-Beograd. Dhe kjo pritet të mos ndryshojë për shkak të “hapave të njëanshëm” në veri.

“Hapat e njëanshëm dhe të pakoordinuar jo vetëm që bien ndesh me marrëveshjet e dialogut, por – edhe më keq – rrezikojnë që aplikimi për anëtarësim në BE të mbetet i mbërthyer në inbox. BE-ja lulëzon duke marrë me vete të gjithë anëtarët dhe komunitetet e tyre dhe ne kemi nevojë për të njëjtën qasje në nivel kombëtar”, ka thënë ambasadori gjerman gjatë ditës.

Gjithashtu, eksperti i politikës së BE-së nga Këshilli për Politikat e Demokratizimit (DPC), Toby Vogel, ka reaguar ndaj deklaratës së Rohdes, duke thënë se ai është duke mashtruar: “Qytetarët dhe politikanët e Kosovës e dinë që nuk ka rrugë për anëtarësimin e shtetit të tyre në BE”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.