![](https://albanianpost.com/wp-content/uploads/2024/05/haziri.jpg)
“E kundërshtoi një Asociacion, po e pranon një Autonomi politike në 17.3 për qind të territorit të Kosovës!”.
Kështu e ka titulluar shkrimin e tij në Facebook, nënkryetari i Lidhjes Demokratike të Kosovës (LDK), Lutfi Haziri, në të cilin ka folur për qëndrimet kontroverse të kryeministrit Albin Kurti, rreth Asociacionit të Komunave me Shumicë Serbe.
“Tre vite vjet as Po e as Jo. Kemi marrëveshje e nuk kemi marrëveshje se nuk është nënshkruar. Po ju duan juve e jo neve. Kemi draft-statut e më vonë thanë nuk kemi. Është dokument zyrtar i punuar nga tre ekspertë evropianë, dërgon komentet me shkrim dhe në mënyrë zyrtare kthehen prapa e thonë është ‘Non Paper’ dokument dhe pa autor”, shkroi fillimisht Haziri.
“Jo Gjykatën Kushtetuese të Republikës tonë, por Komisioni i Venecias si organ i pavarur dhe neutral. Jo draftit Evropian, por një draft i ri në korniza të FES edhe atë për dhjetë ditë ishin të gatshëm ta bëjnë dhe me këtë fakt pranohet Zajednica”, rikujtoi kundërthëniet e Kurtit.
Së fundmi, presidentja Vjosa Osmani, ka kërkuar garancione nga bashkësia ndërkombëtare për Asociacionin, derisa ka theksuar se pasi që qeveria ta miratojë draft-statutin, ajo do ta dërgonte në Kushtetuese.
“Tani Presidentja Osmani me garancione shtesë dhe gatishmëri që pas vendimit të Qeverisë, ajo personalisht ta dërgojë në Gjykate Kushtetuese. Ky është hapi më i madh dhe më i zbardhur si presion ndaj Kurtit si Kryeministër, i cili duhet të veprojë. Atij po i kërkohet ta sjellin vendimin për Asociacion në Qeveri”, shtoi.
Presidentja e dërgon në Kushtetuese dhe sipas Hazirit, “EU/task forca e implementon Zajednicën”.
“Ndarje e re e detyrave. E kundërshtoi një Asociacion e po e pranon një Autonomi politike në 17.3 për qind të territorit të Kosovës. Në gjuhen e Kurtit i bie: Ju nuk e zbatuat Zajednicën, po ua sjell Pokrainën veriore të Kosovës!”.
Në fund, numri dy i LDK-së foli edhe për premtimet e kryeministrit në raport me mërgimtarët.
“Mërgimtarëve që u premtoi 3 milionë euro për kartonin e gjelbër e 10 milionë për kreditë për t’ua servisuar në kohën kur ata 1.2 miliardë dërgojnë remitenca çdo vit Kosovës, nuk duhet me pritë që u jep asgjë tjetër pos Pokrainën në Veri të vendit. Ata e duan Kosovën më shumë se premtimet e tij!”, përfundoi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com