Haxhiu: Së shpejti pritet të përfundoj procesi i ish të burgosurve politik

Ministria e Drejtësisë, Albulena Haxhiu, gjatë ditës së enjte është takuar më anëtarët e Komisionit për njohjen e statusit të ish të dënuarve dhe ish të përndjekurve politikë.

Haxhiu e ka bërë të ditur se ky proces duhet të përfundojë sa më shpejtë dhe të iu njihet kontributi i tyre.

“Për ne njohja e statusit si dhe kompensimi i ish të dënuarve dhe ish të përndjekurve politikë, përveç që është obligim ligjor, është edhe shprehje e vullnetit dhe përkushtimit të Qeverisë së Republikës së Kosovës”

Ajo ka thënë se ky obligim është “dashur të përfundojë vite më parë”, për këtë kategori të njerëzve “të cilët kanë vuajtur nëpër burgjet dhe kazamatet serbe, të u njihet statusi dhe kontributi i tyre, dhe për më shumë shteti dhe shoqëria jonë shprehen mirënjohës dhe falënderues për kontributin që ata kanë dhënë”.

Po ashtu, ajo ka kërkuar nga anëtarët e komisionit që brenda afatit prej 15 ditësh të përgatisin një plan, sipas të cilit do të duhet përfunduar ky proces.

Në mbledhjen e Qeverisë së Kosovës të mbajtur me 11 gusht, Ministrja e Drejtësisë, Albulena Haxhiu, kishte propozuar emrat e Komisionit për njohjen e statutit të ish-të dënuarve dhe ish-të përndjekurve politik

Ky komision ka mandat dy vjeçar.

“Për anëtarë të Komisionit për njohjen e statutit të ish-të dënuarve dhe ish-të përndjekurve politik me mandat dy-vjeçar, propozoj këtë përbërje: Fadil Bunjaku, përfaqësues nga Ministria e Drejtësisë, Petrit Shala, përfaqësues nga Ministria e Financave, Isak Shabani, përfaqësues nga MSH-ja, Hydajet Hyseni-Kaloshi përfaqësues nga Kuvendi i Kosovës, Bertat Luzha, përfaqësues nga Shoqata e të Burgosurve Politik të Kosovës dhe Mazllum Baraliu përfaqësues nga Shoqata e Juristëve të Kosovës”, ka thënë Haxhiu.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.