Haxhiu: Rastet e gripit sezonal në Kosovë mund të jenë të variantit Omicron

Deputeti i Partisë Demokratike të Kosovës, Bekim Haxhiu, ka deklaruar se në spitalet e Kosovës përveç COVID-19 sëmundjet e tjera janë anashkaluar.

Ai ka thënë se në Kosovë është gjendje e rëndë shëndetësore për shkak të gripit sezonal, e që rastet me grip kanë mundësi të jenë raste me variantin Omicron.

“Situatë e rëndë ka qenë me gripin sezonal. Simptomat e gripit sezonal me Omicronin janë të njëjta. Rreziku i përhapjes së tij është e madhe. Kosova nuk ka arritur të rrisë kapacitetet testuese për variantin delta dhe omicron”.

“Kjo paaftësi për të rritur kapacitet ka ndikuar në përhapjen e virusit dhe sot spitalet tona janë të mbushura me pacientë me gripin sezonal apo variantin omicron i paidentifikuar deri tani”, deklaroi Haxhiu.

Ndërsa ka theksuar se, “numri kalon 20 mijëshin e personave me grip sezonal”.

Ndërkaq për vaksinat anti-COVID ai ka paralajmëruar se rrezikohen që këto doza të hedhen njëjtë si ato të AstraZenecas.

“Aktualisht rezulton që në stok të jenë 900 mijë vaksina dhe nëse nuk ka rritje të intensitetit te vaksinimit rrezikojmë që këto doza të hedhen njëjtë si ato të AstraZenecas”.

Ndërkaq, deputeti i Lidhjes Demokratike të Kosovës, Armend Zemaj, ka deklaruar se Spitali i Pediatrisë i financuar nga Emiratet e Bashkuara, vazhdon të mbetet i mbyllur, pavarësisht se Qeveria dhe presidentja Vjosa Osmani e kanë përuruar më parë.

“Diku 4 muaj më parë e pamë mënyrën populiste të stilit të cilën e ka kjo qeveri bashkë me presidenten duke bërë përurimin e këtij spitali duke mos thënë asnjë fjalë për të kaluar, kurse sot spitali vazhdon të jetë I mbyllur”.

“Mbajtja mbyllur e këtij spitali për arsye teknike është papërgjegjësi. Një spital i tillë i ndërtuar me standardet më të mira për 4 muaj nuk kemi kurrfarë përgjigje kur do të funksionalizohet, tregon papërgjegjësinë për të ndërmarrë veprime konkrete për ta funksionalizuar”, deklaroi Zemaj.

Zemaj u shpreh se në mandatin e tij si ministër i Shëndetësisë “është ballafaquar me një kërkesë për ndërprerje të punimeve në spital, ku kërkesa ishte për nëntë muaj të ndaleshin punimet”.

Ndryshe, me gjashtë dhjetor disa mostra të qytetarëve nga Kosova që dyshohet se janë infektuar me virusin më të ri Omicron janë dërguar nga Instituti Kombëtar i Shëndetësisë Publike të Kosovës në Gjermani për analiza.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.