Haxhiu për rastin në Graçanicë: Institucionet duhet të sigurojnë një sistem që garanton mbrojtje ndaj dhunës

Ministrja e Drejtësisë, Albulena Haxhiu, është shprehur e tronditur nga ngjarja që ka ndodhur në Graçanicë, ku një grua ka humbur jetë pasi dyshohet se bashkëshorti i saj e kishte rrahur dhe i kishte shkaktuar lëndime të rënda.

“E tronditur thellësisht nga lajmi i një tragjedie të ndodhur në Graçanicë. Shpreh ngushëllimet e mia të sinqerta për humbjen tragjike të jetës së 41-vjeçares nga Graçanica”, ka shkruar Haxhiu.

Haxhiu, përmes një shkrimi në rrjetin social ‘Facebook’ ka kërkuar nga institucionet që të angazhohen për një sistem që i trajton me seriozitet rastet e dhunës.

“Rastet e dhunës dhe vrasjet e grave janë realiteti i frikshëm dhe i papranueshëm dhe po angazhohemi në vazhdimësi që të ngrisim vetëdijen shoqërore me qëllim të parandalimit të rasteve të dhunës dhe femicidit dhe që dhunuesit dhe vrasësit e grave të marrin dënimet maksimale”.

“Është e nevojshme që institucionet përgjegjëse të angazhohen për një sistem që garanton që çdo rast i dhunës trajtohet me seriozitetin e merituar dhe mbajtjen e dhunuesve e vrasësve përgjegjës”.

“Vrasje e rëndë” është ri-kualifikuar rasti nga Prokuroria Themelore në Prishtinë, vdekja e një gruja e cila jetonte në Graçanicë e i përkiste nacionalitetit serb e ku dyshohet se gjendja e saj kishte ardhur pas sulmit fizik që kishte ardhur nga bashkëshorti i saj.

Ajo në Qendrën Klinike Universitare të Kosovës (QKUK), ishte dërguar dy ditë më parë ndërsa ka ndërruar jetë të premten.

Edhe misioni i Bashkimit Evropian për Sundimin e Ligjit në Kosovë, EULEX, ka reaguar gjatë ditës mbi ngjarjen.

Në reagim ishte thënë se mbështet autoritetet e Kosovës drejt parandalimit të dhunës kundër grave.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.