Sipas ministrit për Evropën dhe Punët e Jashtme, Igli Hasani, integrimi i Shqipërisë dhe Ballkanit Perëndimor në Bashkimin Evropian mbetet kyç për paqen, sigurinë dhe stabilitetin jo vetëm të rajonit, por të gjithë Evropës.
Këto komente ai i bëri gjatë një takimi me sekretarin e përgjithshëm të Shërbimeve për Veprimin e Jashtëm të BE-së, Stefano Sannino, në kuadër të Dialogut Raisina, i cili po mbahet në Indi.
Hasani po ashtu theksoi angazhimin e Shqipërisë për t’u lidhur plotësisht me politikën e jashtme të BE-së dhe progresin e saj të rëndësishëm në procesin e shqyrtimit ligjor, si dhe gatishmërinë për të hapur kapituj themelorë.
Very good meeting on the sidelines of the @raisinadialogue with @EEAS_SecGen Stefano Sannino. Emphasized Albania's commitment to fully align with EU 🇪🇺 foreign policy and its significant progress in the screening process, and readiness to open fundamental chapters.
In the face… pic.twitter.com/Ijf5DdKyvc
— Igli Hasani (@IgliHasani) February 23, 2024
Ndër të tjera, në vizitën e tij në Indi, Hasani ka pasur mundësi të komunikojë edhe me bizneset vendore atje, ku ka parë mundësi me potencial të madh për investime, tregti dhe partneritet, raportin e Shqipërisë me Indinë.
Kështu theksoi ai gjatë një mëngjesi pune me sipërmarrësit indianë dhe shqiptarë – një takim në të cilin u diskutua rreth mundësive për biznes që Shqipëria ofron.
Hasani ftoi kompanitë indiane ta shohin vendin si një mundësi shumë të mirë investimi dhe të shohin nga afër mundësitë dhe hapësirat e reja që iu ofron Shqipëria, jo vetëm për investime dhe biznes por edhe për tregti e partneritet, duke ndërtuar përmes Shqipërisë historitë e tyre të reja të suksesit në rajon dhe më gjerë.
Ministri Hasani vlerësoi gjithashtu se India përbën një vend me shumë potencial për Shqipërinë dhe forcimi i aleancës mes dy vendeve konsiderohet me interes të lartë, në aspektin ekonomik dhe gjeostrategjik.
Hasani mendon se ka një potencial të madh për investime, tregti dhe partneritet me Indinë
Në këtë vizitë, kryedipomati shqiptar shoqërohej edhe nga një delegacion biznesi i Dhomës së Tregtisë dhe Industrisë së Tiranës, kryesisht të sektorit të prodhimit të tekstileve, industrisë së përpunimit të mishit, prodhimit të letrës dhe plastikës, produkteve hidorsanitare, tregtimit të mallrave ushqimore e industriale, si dhe arsimit dhe aftësimit profesional dhe kërkimit shkencor.
India është furnizuesi i katërt më i madh gjatë viteve të fundit për tregun shqiptar. Gjatë vitit 2023 norma e shkëmbimeve tregtare mes dy vendeve arriti 249% më shumë se një vit më parë.
Sipas QKB, në janar 2023, në territorin e Shqipërisë ishin aktive 90 kompani me pronësi indiane. Ndër to, 80 kanë kapital të huaj 100%, ndërsa 10 prej tyre kanë kapital të përbashkët. Kompanitë indiane janë të pranishme në 5 nga 12 rrethet e vendit.
Pjesa më e madhe e këtyre kompanive, përkatësisht 88%, operojnë në territorin e Qarkut të Tiranës, e ndjekur nga Korça (8%), Durrësi (6%), Vlora dhe Elbasani (1%).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
