Hasani kërkon angazhimin e sektorit privat për ndihma humanitare: Të bëjmë më shumë, më mirë, më shpejt

Ministri për Evropën dhe Punët e Jashtme, Igli Hasani, në rolin e kryesuesit të mbledhjes së Këshillit të Sigurimit të OKB-së mbi “Nxitjen e Partneritetit Publik-Privat”, ka kërkuar në emër të Kombeve të Bashkuara më shumë angazhim nga sektori privat, në mënyrë që për njerëzit në nevojë të bëhet “më shumë, më mirë, më shpejt”.

Sipas kryediplomatit shqiptar, bota po përballet me një nivel të paprecedentë nevojash humanitare.

Për këtë arsye, ende qindra milionë njerëz në gjithë rruzullin tokësor e kanë të munguar mbështetjen dhe një vakt të sigurt për të nesërmen nuk e kanë.

Bujaria e donatorëve sipas ministrit nuk ka munguar, por ajo duhet të jetë më e madhe.

“Në një situatë humanitare kaq komplekse, bashkëpunimi me sektorin privat është bërë jetik. Sektori privat mund të ndihmojë për të arritur një reagim ndërkombëtar më efektiv”, shtoi ai.

Mbi këto premisa është thirrur edhe ky debat i hapur në KS nga Shqipëria, e cila mban presidencën e shtatorit, për të forcuar rolin e sektorit privat dhe për të shfrytëzuar potencialin e tyre.

Në këto kushte, është krijuar edhe Aleanca Humanitare e Sektorit Privat, e cila pritet t’i vijë në nidhmë njerëzve në nevojë.

“Aleanca do të shërbejë si një organ koordinues për t’iu përgjigjur krizave humanitare”, vijoi më tej ministri.

Teksa, në mbyllje, theksoi se nëpërmjet Aleancës, synohet të evidentohen boshllëqet dhe fushat për përmirësim në reagimin ndaj krizave, duke e quajtur edhe një hap të guximshëm për të shfaqur ekspertizën e sektorit privat në trajtimin e krizave komplekse.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.