Haradinaj: Qeveria Kurti ua ka ngulur thikë pas shpine kategorive të lirisë

Sipas kryetarit të Aleancës për Ardhmërinë e Kosovës (AAK), Ramush Haradinaj, kryeministri i Kosovës, Albin Kurti, ua ka ngulur thikë pas shpine kategorive të lirisë.

Haradinaj, në tryezën e organizuar nga AAK-ja ka thënë se sakrifica për liri është e “të gjithëve”.

Duke thënë se kushdo që ka bërë sakrificë për liri e ka bërë për kombin.

“Çdo brez i atyre që kanë bërë sakrificë për liri, ndjen respekt për pasardhësit gjithashtu ndjehet i fyer kushdo që e fyen sakrificën e kujtdo për liri. Një besim që ka lind në sakrificë, që nuk ka qenë i lehtë të fitohet e s’ka qenë i lehtë që të mbahet. Kurti dhe kjo qeveri i ka ngul thikë pas shpine sakrificës tonë për liri, kategorive të lirisë”.

“Sjellja e Kurtit ndaj kësaj kategorie është jonjerëzore, joshtetërore dhe joinstitucionale”.

Ai ka thënë se është i bindur për veteranët nëse janë të vërtetë apo jo.

“Unë jam veteran, kam emër e mbiemër. S’jam Albin Kurti, që prej kafeve që i ka pirë me serbë ka shkuar në zyrë të Demaçit, e prej aty në Serbi në burg. Nuk jam Mimoza Kusari, e unë e di a janë kanë veteranët e vërtetë a jo”, ka thënë ai.

Kurse, shefi i grupit paralmentar nga AAK-ja, Besnik Tahiri, deklaroi se tryeza e organizuar ka për synim “një bashkëbisedim të hapur për çështjet që i preokupojnë shoqatat e dala nga lufta”.

Nga Organizata e Veteranëve, Xhavit Jashari, ka potencuar se pa luftën e Ushtrisë Çlirimtare të Kosovës, vendi nuk do të ishte ky që është tash.

“Është jonormale sot në këtë vend që kemi një qeveri që në këtë situatë çfarë gjendet Kosova të atakohet lufta e UÇK-së”.

“Ne i kemi shprehur qëndrimet tona që tutje nuk do të lejojmë që të nëpërkëmbet kjo vlerë kur preken veteranët. Vendimet e fundit të kësaj qeverie përmes deputetëve mendoj që ka bërë një tradhti të madhe”, ka thënë ai.

Ndërsa sipas Bajram Qerkinit nga Shoqata “Zëri i Prindërve”, asgjë që ka premtuar Qeveria deri tani nuk është realizuar.

Fadil Shurdhaj, nga Shoqata e invalidëve të luftës ka fajësuar edhe qeveritë e kaluar që kanë ndarë vazhdimisht të njëjtin buxhet.

“Mendoj që kjo Qeveri është duke e bërë qëllimisht vetëm për humbjen e dinjitetit të krejt luftëtarëve. Deputetët e Kuvendit të Kosovës nuk është dashur të na lënë ne që ta ngremë zërin. Do të na detyrojnë që t’i marrim protezat e t’i lemë para Qeverisë”, ka thënë ai.

Grupi Parlamentar i Aleancës për Ardhmërinë e Kosovës, pas takimimeve me përfaqësuesit e shoqërisë civile dhe mediave, ka vazhduar të hënën me ciklin e diskutimeve, të cilat fokus kanë situatën e rëndë politike në Kosovë.

Kreu i AAK-së, Ramush Haradinaj, është i vetmi lider opozitar që i ka dhënë përkrahje kryeministrit Albin Kurti për Marrëveshjen e arritur fillimisht në Bruksel më 27 shkurt, pastaj në Ohër më 18 mars, për rrugën drejt normalizimit të marrëdhënieve mes Kosovës dhe Serbisë, duke vlerësuar se aty është njohja defacto nga Serbia.

Megjithatë, pas situatës së krijuar në pjesën veriore të Kosovës të banuar me serbë etnikë dhe vendosjen e masave ndëshkuese ndaj vendit nga bashkësia e organizuar ndërkombëtare, opozita po përpiqet që të gjejë një “rrugë të re” për mbajtjen e zgjedhjeve të parakohshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.