Haradinaj: Osmani, Kurti e Gërvalla “në luftë të pakompromis” për elektoratin rugovist në Podujevë

Kryetari i Aleancës për Ardhmërinë e Kosovës, Ramush Haradinaj, të shtunën, nëpërmjet një postimi në platformën sociale, Facebook, ka kritikuar presidenten e Kosovës, Vjosa Osmanin, kryeministrin, Albin Kurtin e ministren e Jashtme, Donika Gërvallës, për siç ka quajtur ai “luftë të pakompromis” për elektoratin rugovist në Podujevë.

Krerët e shtetit të shtunën morën pjesë në përurimin e shtatores së ish-presidentit të ndjerë të Kosovës, Ibrahim Rugova, në Komunën e Podujevës.

“Secili, në formën e vet të mashtrimit, pretendon se çmon vlerat e Presidentit Rugova. Përderisa Albini dhe Donika, për të gjallë të tij, nuk e kanë fshehur urrejtjen dhe mosrespektin ndaj tij, Vjosa, si më e reja, përveç retorikës së pasur pro-rugoviane, asgjë rugoviste nuk ka”, ka shkruar Haradinaj.

“Nuk është keq të përmendim fjalorin e Rugovës që sot, po të ishte gjallë, do të thoshte: ‘Falënderoj Presidentin Biden, Kryeministrin Staimer, Kryeministrin Scholz, Presidentin Macron, Papën dhe miqtë e Kosovës. Zoti e bekoftë Amerikën dhe popullin e Kosovës’”, ka shtuar ai.

Në vlerësimin e tij Kurti e Gërvalla një përshëndetje të tillë nuk e thonë kurrë – “as që e mendojnë”, ndërkaq Osmani edhe kur e thotë – “çdo ditë e më pak njerëz e besojnë dhe kanë të drejtë që nuk e besojnë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.