Haradinaj kujton masakrën në Makoc: Brezi ynë dhe ata pas nesh, duhet ta ruajnë lirinë

Kreu i Aleancës për Ardhmërinë e Kosovës, Ramush Haradinaj, përmes një shkrimi në rrjetin social ‘Facebook’, ka kujtuar përvjetorin e Betejës së Marecit dhe masakrës në Makoc.

“Pikërisht sot, në përvjetorin e Betejës së Marecit dhe masakrës në Makoc, Prishtina shënon Ditën e Dëshmorëve”.

“Misioni ynë historik për liri dhe pavarësi u realizua falë veprës heroike të luftëtarëve çlirimtarë dhe sakrificës së Dëshmorëve e Martirëve, që gjithmonë janë frymëzim në ndërtimin e të sotmes dhe të ardhmes”, ka shkruar Haradinaj.

Ai tutje ka kujtuar edhe vlerat që karakterizonin atë kohë.

“Duke kujtuar trimërinë, vendosmërinë e guximin  e luftëtarëve të Brigadës 153 Hyzri Talla, gueriljes BIA, dhe tërë elementit liridashës që dha gjithçka për çlirimin e fitoren e madhe, brezi ynë dhe ata pas nesh, duhet ta ruajnë këtë liri si vlerën më të shenjtë kombëtare”.

Edhe kryeministri i Kosovës, Albin Kurti, ka bërë homazhe tek sheshi Zahiri Pajaziti.

“E kaluara e lavdishme është vendimtare për drejtimin dhe shpejtësinë në ecjes përpara të Kosovës si shtet dhe të shqiptarëve si komb. Si qeveri e republikës së Kosovës asnjëherë  nuk do ta harrojmë se nga vijmë dhe ku duhet të shkojmë pikërisht duke ju falënderuar gjakut të derdhur për liri i cili nuk shlyhet kurrë”.

Ai gjithashtu kujtoi me këtë rast Zahir Pajazitin.

“Prishtina si kryeqytet gjatë luftës Çlirimtare të Kosovës vendi, kishim për komandant Zahir Pajziti i cili me aksionet e tij çlirimtare e dha kushtrimin e lirisë shumë herët para se të fillonte lufta çlirimtare dhe më këtë mënyrë e mobilizoi gjithë popullin”.

Ai tutje ka bërë të thirrje tek populli që edhe ata të punojnë për një të ardhme më të mirë.

“Ne që e mbajmë mend dhe e kemi jetuar atë kohë por edhe ata të cilët rriten sot që të gjithë duhet ta dinë mirë prej nga vinë në mënyrë që të jemi të sigurt për rrugën përpara. Këtyre që kontribuuan e sakrifikuan ju kemi borxhe që të ardhmen ta e bëjmë shumë më të ndritshme”.

Ndryshe edhe shoqata e dalur nga Lufta e Ushtrisë Çlirimtare të Kosovës në bashkëpunim me Komunën e Prishtinës, organizojnë “Ditët e Krenarisë” në shenjë nderimi për dëshmorët e Komunës së Prishtinës.

Në këtë ditë, ata do të bëjnë homazhe në varrezat e Dëshmorëve në lagjen Velania, nderim te shtatorja e dëshmorit “Zahir Pajaziti”, po ashtu dhurim i gjakut tek sheshi “Zahiri Pajaziti si dhe do të marrin pjesë në akademinë përkujtimore për dëshmorët në Sallën e Kuqe të Pallatit të Rinisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.