Haradinaj kërkon nga Kurti që të merr anën e drejtësisë dhe ligjit “nëse dikush nga ju ka shkelur ku nuk duhet, t’i tregohet vendi”

Ish kryeministri i Kosovës dhe kryetari i Aleancës për Ardhmërinë e Kosovës (AAK), Ramush Haradinaj, në seancën e Kuvendit të Kosovës ka pasur një kërkesë për kryeministrin, Albin Kurti pas arrestimit të drejtorit të Korporatës Energjetike të Kosovës (KEK), Nagip Krasniqi.

Haradinaj nga Kurti kërkoi që t’i besoj ligjit dhe drejtësisë së Kosovës.

“Nuk besoj që është besnikëri me marrë pozicion të gabuar në interes të përgjithshëm. Ne në luftë ne jemi vrarë, jemi plagosur, disa nuk janë këtu, disa jonë në burgje për çështjen tonë kombëtare edhe sot”.

“E kisha lut kryeministrit ta merr anën e drejtësisë dhe ligjit edhe nëse ka dyshime dhe konspiracione e kisha lut ta merr anën e ligjit dhe drejtësisë. I lus institucionet të mos e bëjnë këtë gabim”, ka thënë Haradinaj.

Ai tutje e ka këshilluar pushtetin që të kenë gatishmëri për sakrificë.

“Për me ec përpara duhet të jesh i gatshëm edhe në sakrificë, udhëheqësit e zot e dinë këtë, që i bie nëse dikush nga radhët e juaja ka shkelur ku nuk duhet, duhet t’i tregohet vendi. Me dhimbje po them, por duhet t’i tregohet vendi”.

Kryeministri i Kosovës, Albin Kurti, gjatë fjalimit të tij në seancën plenare, një ditë pas arrestimit të kryeshefit të Korporatës Energjetike të Kosovës, Nagip Krasniqi, nga Policia e Kosovës nën dyshimin për keqpërdorime në disa tenderë, një prej tyre 3.4 milionë euro, ka pranuar se arrestimi i këtij të fundit bazohet në fakte.

“Kjo çështje ka fakte dhe ato ne urojmë dhe shpresojmë që të merren me profesionalizëm dhe me përpikmëri. Është sistemi i drejtësisë ai i cili po merret me çështjen e tij”.

“Në anën tjetër është fakt se pati një gëzim opozitar për arrestimin e kryeshefit Krasniqi, ky është fakt i opozitës nuk është fakti i çështjes”.

Sipas tij Prokuroria Speciale është shumë e zellshme me këtë rast, ani pse edhe në të kaluarën ka pasur keqpërdorime nga ana e kryeshefave të KEK-ut, të cilët nuk janë hetuar fare.

Krasniqi po dyshohet për keqpërdorime në një tender prej 3.4 milionë euro me kompaninë “Litwin SA” dhe partnerin vendor “Bujar B. Shala B.I.”, për kryerjen e punëve për remontin e turbinës dhe gjeneratorit të Njësisë A5 të TC “Kosova A”.

Pas arrestimit të Krasniqit nga policia e Kosovës, një numër deputetësh nga Vetëvendosja, akuzuan kryeprokurorin e Prokurorisë Speciale, Blerim Isufajn, se arrestimin e ka bërë me qëllime malicioze, duke provuar kështu hakmarrje, meqë presidentja, Vjosa Osmani, nuk po e emëron kryeprokuror të shtetit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.