Haradinaj ia shpreh nevojën zyrtares së DASH-it për mbështetje në proceset e ardhshme

Kryetari i Aleancës për Ardhmërinë e Kosovës (AAK), Ramush Haradinaj, është takuar të premten me drejtoreshën për çështje evropiane në Departamentin Amerikan të Shtetit, Colleen Hyland, me të cilën ka thënë se ka biseduar për proceset në të cilat po kalon Kosova.

Haradinaj, takimin e ka bërë të ditur përmes një shkrimi në rrjetin social ‘Facebook’.

“Sot së bashku me kolegë pritëm në takim Znj. Colleen Hyland, Drejtoreshë për Çështje Evropiane në Departamentin Amerikan të Shtetit”.

“E falënderova për mbështetjen e vazhdueshme që ShBA-të japin për Kosovën. Biseduam për proceset në të cilat po kalon vendi ynë, si dhe shpreha nevojën për mbështetje në proceset e ardhshme që na presin”, ka shkruar Haradinaj.

Edhe kryetari i Lidhjes Demokratike të Kosovës (LDK), Lumir Abdixhiku, ka takuar të enjten drejtoreshën për Evropën Jug Qendrore në Departamentin Amerikan të Shtetit (DASH), Colleen E. Hyland, ku ka shprehur pikëpamjet e LDK-së për draft-statutin e propozuar nga Bashkimit Evropian (BE) për themelimin Asociacionin e Komunave me Shumicë Serbe në Kosovë.

Kreu i LDK-së, ka njoftuar se zyrtares amerikane ia ka shprehur edhe mirënjohjen për angazhimin e Shteteve të Bashkuara të Amerikës (SHBA), posaçërisht sa i përket procesit të dialogut për normalizimin e marrëdhënieve Kosovë-Serbi nën kujdesin e BE-së, duke kërkuar që mbështetja ndaj Kosovës të vazhdojë.

“Në takim i kërkova që kjo mbështetje për Kosovën – për popullin tonë – të vazhdojë, veçmas në procesin e ndjeshëm dialogues me Serbinë, me qëllim të mbrojtjes së interesave tona shtetare, të përcaktuara në Kushtetutë e Deklaratë të Pavarësisë”, ka shkruar ai.

BE-ja ua ka dorëzuar partive opozitare një kopje në gjuhën angleze të draft-statutit të Asociacionit të Komunave me Shumicë Serbe, derisa Abdixhiku ka shprehur shqetësimin për përmbajtjen e dokumentit, duke e cilësuar një autonomi të zgjeruar territoriale që mund të çojë drejt federalizmit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.