Lajme

Haradinaj e takon Escobar-in, flasin për sigurinë e dialogun


Ish-kryeministri i Kosovës, tani kryetar i Aleancës për Ardhmërinë e Kosovës, Ramush Haradinaj, është takuar me emisarin amerikan për Ballkanin Perëndimor, Gabriel Escobar dhe kanë biseduar për sigurinë dhe fazën finale të dialogut mes Kosovës dhe Serbisë.

Këtë e ka bërë të ditur vet Haradinaj përmes një postimi në llogarinë e tij në Facebook.

“Biseduam për temat e politikës së jashtme dhe sigurisë në Kosovë, dhe ripërsërita përkushtimin tonë për një Marrëveshje Gjithëpërfshirëse ligjërisht të obligueshme, e cila ka epilog njohjen reciproke dhe respekton integritetin, sovranitetin dhe rendin kushtetues të Republikës së Kosovës”, ka shkruar Haradinaj.

“Theksova se kjo gjë mund të arrihet vetëm me rolin aktiv të Shteteve të Bashkuara të Amerikës.  Falënderova Escobar-in për angazhimin e tij të jashtëzakonshëm për Kosovën”.

Më 8 maj, Haradinaj ishte për darkë në familjen Gecaj bashkë me kongresmenin Ritchie Torres, ambasadorin shqiptar në OKB, Ferit Hoxha, Harry Bajraktari e të pranishëm të tjerë.

Haradinaj në vizitën e tij zyrtare do të takohet me kongresmenë, anëtarë të administratës Biden e personalitete të sigurisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore