Lajme

Haradinaj: Çka ka PDK që është çu peshë kundër Fondit të Sigurisë?


Ramush Haradinaj, Kryetar i AAK-së

Deklaratës së deputetit të Partisë Demokratike të Kosovë, Hisen Berisha, se mjetet që janë duke u grumbulluar në Fondin e Sigurisë së Kosovës nuk duhet të përdoren për FSK-në, e kanë nxitur kreun e Aleancës për Ardhëmrinë e Kosovës, Ramush Haradinaj që të reagojë.

“Çka janë çu peshë disa eksponentë të PDK kundër Fondit të Ushtrisë? S’po e kuptoj ku e kanë hallin”, ka shkruar Haradinaj në llogarinë e tij në Facebook.

“A po iu pengon forcimi i ushtrisë, a po iu dhimbsen qytetarët që janë të gatshëm ta ndihmojnë ushtrinë e tyre, apo e kanë problemin me Albin Kurtin?!”, ka shtruar disa pyetje publike Haradinaj.

“Nëse është kjo e fundit, ka hapësirë boll për ta sulmuar Albin Kurtin, të cilit edhe ashtu i “ka hup rruga n’oborr”!”.

Më tej ish komandanti i UÇK-së, Ramush Haradinaj, ka shtuar se pa ushtri nuk ka shtet dhe “ta ndihmosh ushtrinë e vendit tënd është detyrë patriotike dhe shqiptarët e dinë më mirë se kushdo tjetër këtë gjë”.

Hisen Berisha, deputet i PDK-së

Deputeti i PDK-së, Hisen Berisha, ka deklaruar se mjetet që po grumbullohen për Fondin e Sigurisë nuk duhet të lejohet që të përdoren për Forcën e Sigurisë së Kosovës.

“Nuk është e sigurtë prejardhja e mjeteve”, ka thënë Berisha në Klan FM. “Ushtria duhet të financohet nga buxheti i shtetit. Për ushtri duhet të ndahet buxhet në rrugë formale, ligjore, që të mos ndodhë komprometimi i këtij institucioni”, është shprehur Berisha.

“Ky fond është ilegal. Mënyra e mbledhjes është duke e keqpërdorur sedrën e shqiptarëve si në Kosovë ashtu edhe në diasporë. E kemi dëshmuar në kohë të luftës duke krijuar fondin ‘3 për qind’, pastaj fondin ‘Vendlindja thërret’. Nuk është mirë të provokohet sedra e shqiptarëve në këtë fushë sepse secili është i gatshëm të japë për ushtri”, ka vazhduar më tej ai.

Sipas Berishës mjetet e dhëna për fondin mund të ridestinohen sipas vendimit mbi të cilin është themeluar fondi.

“Nuk është i destinuar ekskluzivisht për ushtrinë. Këta [Lëvizja Vetëvendosje] janë kyçur në politikë përmes kauzave të rrejshme. Janë specialistë të kauzave të rreme. Çdo ditë ata po shndërrohen në specialistë mashtrimi dhe çdo premtim i tyre është mashtrim. Edhe kjo formulë [fondi] është mashtrim”, ka thënë Berisha.

Ai ka thënë se është kohë që të forcohet buxheti për ushtrinë, por siç thotë ai në linja ligjore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore