Hapet në Hagë qendra për ndjekjen e krimeve të agresionit rus

Në Hagë është hapur një qendër për ndjekjen penale të krimeve të agresionit të kryera në Ukrainë.

Qendra mësohet të jetë hapur me mbështetjen e BE-së, SHBA-ve dhe Gjykatës Penale Ndërkombëtare (ICC).

Presidentja e Komisionit Evropian Ursula von der Leyen ka thënë se qëllimi i qendrës është të sjellë para drejtësisë të përfshirët në “tmerret e papërshkrueshme” si dhuna seksuale, rrëmbimi i fëmijëve dhe zhvendosja e civilëve.

“Ne nuk do të lëmë gur pa lëvizur për të mbajtur përgjegjës Vladimir Putin-in dhe pasardhësit e tij”, ka ravijëzuar ajo.

Sakaq, ICC ka lëshuar tashmë një urdhër arresti për Putin-in, duke e akuzuar atë për përgjegjësi personale për rrëmbimin e fëmijëve nga Ukraina.

Mirëpo, ekspertët ligjorë, përfshirë kryeprokurorin, kanë ndjerë prej kohësh nevojën për një qendër për të ndërtuar raste kundër “krimeve të agresionit”.

Krijimi i Qendrës Ndërkombëtare për Ndjekjen e Krimit të Agresionit (ICPCA) u nxit nga nevoja e perceptuar për të filluar mbledhjen e të dhënave, intervistimin e viktimave dhe ndërtimin e dosjeve të provave përpara përfundimit të luftës.

Një grup ekspertësh dhe katër prokurorë, duke përfshirë një të dërguar nga SHBA-të, filluan me detyrën e mbledhjes së provave dhe ndërtimit të strategjive të çështjeve për të ndihmuar si prokurorët ndërkombëtarë ashtu edhe ata vendorë të sjellin kriminelët para drejtësisë.

Komisioneri i drejtësisë i BE-së, Didier Reynders, ka thënë se qendra do të sigurojë që “autorët e kësaj lufte të mos mbeten të pandëshkuar”.

Andriy Kostin, prokurori i përgjithshëm i Ukrainës, ka treguar se qendra do të mbledhë prova për rastet e mundshme kundër udhëheqësve ushtarakë dhe politikë rusë.

“Drejtësia krijon paqen. Nuk mund të ketë paqe pa krahun e drejtësisë që të arrijë të gjithë planifikuesit apo arkitektët e këtij krimi që ka kërcënuar jo vetëm sovranitetin dhe lirinë e Ukrainës, por stabilitetin dhe funksionalitetin e sigurisë ndërkombëtare dhe të sistemit ligjor”, ka theksuar ai.

ICPCA – platforma e parë e këtij lloji në historinë e gjyqësorit – do të operojë me një ekip të përbashkët hetimor që do të përbëhet nga ekipet e ndjekjes penale në Ukrainë, Lituani, Letoni, Estoni, Poloni, Sllovaki dhe Rumani.

Ladislav Hamran, presidenti i Eurojust, agjencia e BE-së për bashkëpunimin në drejtësinë penale, ka thënë se qendra nuk do të përgatisë padi.

Ajo do të mbledhë prova dhe do t’i ndajë ato me gjykatat kombëtare dhe ndërkombëtare për të ndihmuar në strategjinë e mënyrës më të mirë për të marrë drejtësi.

Sipas tij, është jetike që të “sigurohen prova thelbësore dhe të fillohet ndërtimi i rastit. “Ne nuk duam të presim deri në fund të konfliktit”, ka shtuar ai.

Një gjykatë kushtuar krimeve të agresionit është gjithashtu në shqyrtim nga BE-ja, SHBA-të dhe Ukraina.

“Nëse krimet e agresionit nuk do të ishin kryer, nuk do të kishte 93 mijë incidente të tjera të krimeve të luftës”, ka thënë Kostin.

Kjo ditë është “dëshmi se krijimi i një gjykate speciale tani është i pashmangshëm”.

Kurse Karim Khan, prokurori i ICC, ka thënë se krijimi i qendrës do të ishte fillimi i procesit për të sjellë drejtësi për njerëzit që kishin më shumë nevojë për të, nga cili vend qofshin.

“Ne nuk jemi në anën e Ukrainës. Ne jemi në anën e drejtësisë. Ne jemi të pavarur dhe të paanshëm”, ka qartësuar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.