Hapen pikat kufitare në Merdarë dhe Bërnjak

Pikëkalimet në mes të Kosovës dhe Serbisë, më saktësisht ato në Merdarë e Bërnjak, janë hapur për qarkullim të shtunën.

Lajmi është bërë i ditur nga Ministri i Punëve të Brendshme, Xhelal Sveçla, përmes një postimi në Facebook.

“Pas pranimit të njoftimeve se tashmë janë larguar bllokadat e krijuara nga ekstremistë të maskuar që kanë qenë të vendosura dje në territorin e Serbisë dhe duke parë se nuk ka ndonjë pengesë për qarkullim nga dhe drejt pikave kufitare të Republikës së Kosovës, morëm vendimin për hapjen për qarkullim të pikave kufitare Merdarë dhe Bërnjak”, shkroi Sveçla.

“Rend dhe ligj, paqe e siguri, cep më cep e në çdo kufi të Republikës tonë”, përfundoi.

Pikëkalimet ndërmjet Kosovës dhe Serbisë në Merdarë e Bërnjak kanë qenë të mbyllura që nga e premtja, pas vendimit të institucioneve kosovare.

Ky vendim kishte ardhur pasi që një grup i serbëve kishin bllokuar pikën kufitare në Jarinje, derisa nuk i lejonin që të kalonin ata që posedonin dokumente të Kosovës.

Bllokimi i kufijve nga ana e Serbisë si shenjë revolte ndaj politikave të Qeverisë së Kosovës në raport me Veriun e vendit nisi si aksion të premten e 6 shtatorit.

Bllokadat në kufij – Osmani thirrje Perëndimit: Dënoni shkeljet e vazhdueshme të Serbisë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.