Kosova

Hamza pret Clarkun: Kosova, shtëpi e çdo amerikani


Bedri Hamza dhe Wesley Clark

Kandidati i Partisë Demokratike të Kosovës (PDK) për kryeministër, Bedri Hamza, nëpërmjet një postimi në “Facebook” të dielën, njoftoi se ka pritur në takim gjeneralin amerikan në pension Wesley Clark, i cili gjatë luftës në Kosovë ka shërbyer në pozitën e komandantit suprem të aleatëve të NATO-s.

“Kosova është shtëpi e çdo amerikani”, ka shkruar kryetari i Mitrovicës. “Ne, duke e nderuar të kaluarën e kemi ndërtuar të tashmen dhe po e krijojmë një të ardhme më të mirë për gjithë qytetarët tanë, pa dallime, gjithandej Kosovës. SHBA-ja dhe miqtë ndërkombëtarë, ata që nuk na braktisën kurrë, janë hisedarët kryesorë të sukseseve në 25 vjet liri dhe 16 vjet pavarësi”.

Clark ka qenë komandant i përgjithshëm i forcave evropiane të NATO-s, në kohën e bombardimeve të Republikës Federale të Jugosllavisë (RFJ), që filluan më 24 mars 1999 dhe përfunduan më 10 qershor 1999.

“Në qershorin e vitit 1999, bashkë e fituam lirinë. Në këtë qershor, 25 vjet pas, jemi bashkë e do të jemi gjithmonë, sepse e përjetshme është mirënjohja për gjeneralin, për ushtarët dhe gjithë popullin amerikan”, ka shkruar ndër të tjera Hamza, duke lartësuar figurën e ish-shefit ushtarak të NATO-s.

Paraprakisht, kreu i Lidhjes Demokratike të Kosovës (LDK), Lumir Abdixhiku, ka ndarë dekoratën “Dr. Ibrahim Rugova” për rolin historik dhe kontributin personal të Clarkut gjatë luftës së fundit në Kosovë.

Për shkak të rolit në çlirimin e Kosovës, shumë rrugë mbajnë emrin e Clarkut. Megjithatë, përveç shtatoreve, rrugëve e bizneseve, kontributi i figurave kryesore amerikane që sollën lirinë e Kosovës para 25 vjetësh është shënuar edhe në një mënyrë tjetër, duke pagëzuar fëmijët për nder të tyre.

Kosova sivjet ka shënuar 25-vjetorin e Lirisë apo Çlirimit – atëherë kur tankset britanike “Challenger” në rrugë tokësore dhe “Apache-t” amerikanë përmbi qiell, në kuadër të trupave paqeruajtëse të aleancës veriatlantike, filluan marshimin në Kosovë – pas fushatës 78 ditore të NATO-s kundër caqeve ushtarake e policore serbe në Kosovë, Serbi dhe Mal të Zi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore