Hamasi thirrje vendeve arabe dhe myslimane për “qëndrim vendimtar” pas sulmit në Jabalia

Hamasi ka nxjerrë një deklaratë pas sulmit izraelit të kësaj të marte të 31 tetorit në Jabalia.

Grupi u ka bërë thirrje vendeve arabe dhe myslimane “të mbajnë një qëndrim historik dhe vendimtar për të ndaluar masakrat” e kryera nga Izraeli.

Hamasi i ka cilësuar sakaq sulmet si “gjenocid” kundër popullit palestinez.

“Masakra e okupimit terrorist sionist në kampin Jabalia tolerohet nga të gjitha vendet, qeveritë dhe organizatat që mbështesin këtë entitet sionist terrorist”, thuhet në deklaratë.

“Ata janë të gjithë të njëanshëm ndaj agresionit dhe krimit izraelit 25 ditë më parë, para së gjithash Shtetet e Bashkuara të Amerikës”, ka vijuar deklarata.

Po ashtu shtohet se “gjaku, eshtrat dhe plagët” e të vrarëve do të mbeten.

“Kur do të nxiten ndërgjegjet për të ndaluar serinë e masakrave, për të hapur kalimin e Rafahut, për të sjellë mbështetje, ndihmë, karburant dhe spitale fushore në Rripin e Gazës dhe për të shpëtuar mijëra jetë dhe shpirtra të pafajshëm, duke përfshirë fëmijë, gra, të sëmurë dhe të plagosur?”, mbyllet deklarata.

Në bazë të raportimeve të fundit mediatike, një goditje e Izraelit në kampin Jabalia ka shkaktuar mbi 100 viktima palestineze, me numrin ende të pacaktuar.

Situata në fakt është kaotike në këtë zonë, ku imazhet dhe videot e fundit nga kampi i refugjatëve Jabalia tregojnë ndërtesa të dëmtuara rëndë, ndërsa shpëtimtarët dhe vullnetarët përdorin duart e tyre të zhveshura për të kërkuar të mbijetuarit në sasi të mëdha mbeturinash betoni.

“Është një masakër masive. Është e vështirë të numërosh numrin e ndërtesave që janë shkatërruar këtu”, raporton Anas Sharif i medias së Katarit, Al Jazeera, i cili është në vendngjarje.

Njerëzit në pjesë të ndryshme të shkatërrimit mund të shihen furishëm duke u përpjekur të tërheqin njerëzit nga rrënojat – shumë prej viktimave gra dhe fëmijë.

Të tjerë shihen duke qëndruar në këmbë dhe duke qarë, nga frika se anëtarët e familjes dhe miqtë mund të jenë mes të vdekurve.

Automjetet e shkatërruara mbushin skenën. Pjesëtarët e njësive të mbrojtjes civile janë në terren në kërkim të të mbijetuarve. Një pamje ajrore e zonës tregon ndërtesa të larta të rrafshuara plotësisht me tokë.

Hetimet tregojnë se Izraeli përdori fosfor të bardhë

Një investigim i ri nga grupi i të drejtave me bazë në Mbretërinë e Bashkuar “Amnesty International” ka gjetur se “ushtria izraelite përdori pa dallim, dhe për këtë arsye në mënyrë të paligjshme”, fosfor të bardhë në një sulm në Dhayra, në Libanin jugor, më 16 tetor.

“Sulmi duhet të hetohet si një krim lufte”, tha Amnesty International në median sociale “X”.

Nuk ka pasur asnjë koment të menjëhershëm nga Izraeli, i cili në të kaluarën ka mohuar akuza të tilla.

Grupet e të drejtave të njeriut kanë akuzuar autoritetet izraelite për përdorimin e fosforit të bardhë në sulmet e tij si në Gaza ashtu edhe në Liban.

Banorët e Dhayra-s, Libani i Jugut, i thanë L’Orient-Le Jour më herët se Izraeli përdori fosfor të bardhë mbrëmjen e 16-17 tetorit.

Ata thanë se sulmet e fosforit të bardhë penguan civilët të iknin, shpëtimtarët të mbërrinin dhe ndezën disa nga shtëpitë dhe fushat përreth.

Përdorimi i fosforit të bardhë është i ndaluar kundër civilëve ose objekteve civile sipas Protokollit III të Konventës për Disa Armë Konvencionale.

Izraeli përdori gjithashtu fosfor të bardhë në Gaza në vitet 2008 dhe 2009.

L’Orient-Le Jour kreu një hetim për të përcaktuar nëse Izraeli përdorte fosfor të bardhë në Dharya.

Gazetarët libanezë intervistuan rreth dhjetë banorë që ishin në vendngjarje në atë kohë, mjekë, pjesëtarë të mbrojtjes civile, ekspertë ushtarakë dhe avokatë të të drejtave të njeriut.

Ministria e Shëndetësisë e drejtuar nga Hamasi në Gaza deklaroi më herët se ka regjistruar vdekjen e të paktën 219 personave gjatë ditës së kaluar, duke e çuar numrin e të vdekurve në 8 mijë e 525 që nga fillimi i luftës.

Zëdhënësi Ashraf al-Qidra tha në një konferencë shtypi televizive se viktimat përfshijnë 3 mijë e 542 fëmijë dhe 2 mijë e 187 gra.

Shifrat e Hamas-it nuk mund të verifikohen në mënyrë të pavarur dhe ka të ngjarë të përfshijnë anëtarë të grupit terrorist dhe luftëtarë aleatë, si dhe njerëz të vrarë nga sulmet me raketa brenda Rripit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.