Halit Sahitaj flet për një takim të tij dhe Faik Imerit në Beograd me krerët e BIA-s

Zbulimi shokues për dëshmitë e rreme të Halit Sahitajt në Hagë kundër krerëve të UÇK-së, kishte treguar se në një moment të intervistës së tij me prokurorët – ai kishte folur rreth planeve të tij për të udhëtuar në Beograd.

“Transkripti e bën të qartë se (REDAKTUAR) ka një marrëdhënie me Shërbimin Sekret Serb. Në një moment të intervistës, ai informoi Zyrën e Prokurorit të Specializuar rreth planeve të tij për të udhëtuar në Beograd (REDAKTUAR) ku do ta takonte burimin e tij (REDAKTUAR), në mënyrë që të ishte në gjendje të siguronte më shumë përgjigje për Zyrën e Prokurorit të Specializuar”, thuhet në një shkresë të avokatit britanik, Ben Emmerson, publikuar në faqen e Dhomave të Specializuara.

Se udhëtoi në Beograd dhe pat një takim me zyrtarë të Shërbimit Sekret Serb, disa ditë pas dëshmisë së tij në Hagë, Sahitaj e konfirmon edhe në deklaratën e përfshirë në raportin e ish agjentit të DEA-s amerikane.

“Rreth 7 tetorit, isha në Monako. Kur po flisja me Florianin në telefon, ai më sugjeroi që të shkonim në Serbi…  U takuam afër Vjenës. Pastaj, me makinën time u nisëm për në Beograd. Gjatë udhëtimit, ai tha se donte të më prezantonte me kolegët e tij të CIA-s në Ballkan”.

“Një ditë pasi mbërritëm në Beograd, do të shkonim për një drekë. Unë supozova se do të takoheshim me disa njerëz amerikanë. Në vend të kësaj, ne u takuam me përgjegjësin e dytë të inteligjencës serbe, Bojan Dimic, Komandantin e Xhandarmërisë, dhe Milan Radojcic, një politikan i njohur radikal serb i lidhur me mafian”.

“Nuk jemi takuar kurrë me ndonjë zyrtar amerikan”, ka thënë Sahitaj në raportin e ish agjentit të DEA-s amerikane.

Në një bisedë telefonike midis Halit Sahitaj dhe Bojan Dimiç – një nga figurat kryesore të Shërbimit Sekret Serb, një agjent i BIA-s për Kosovën, dëshmon afërsinë dhe bashkëpunimin mes tyre.

Bojan Dimic: “Këta udhëtarë për Hagë, ashtu po i depërtojnë, nuk di çfarë po mendoni?”,

Halit Sahitaj: “Ju falemnderit, zotëri! Urime! Si jeni”?

Halit Sahitaj: “Dhe ju falënderoj edhe juve për bashkëpunimin”.

Bojan Dimic: “S’ka përse! Po mundohemi dhe po shkojmë tutje me këtë intensitet, dhe kështu, shkojmë tutje”.

Hait Sahitaj: “Shkojmë tutje”.

Halit Sahitaj: “Më kujtohet kur ka vdekur Josip Broz Tito, babai im qau”

Bojan Dimic: “Për Zotin, kam qarë edhe unë. Edhe mua më kujtohet. Por, nuk e di a kanë qenë ata lot të vërtetë, apo të rrejshëm. Por, më është dashur të qaj”.

Halit Sahitaj: “Edhe e kam pyetur – përse po qan? Ai më tha – po rendi është kështu, duhet të qajmë kur vdes Presidenti”.

Bojan Dimic: “Ashtu ka qenë, për Zotin. Më kujtohet edhe mua”.

Halit Sahitaj: “Ndërsa ky nuk ka vdekur… Mos të qajmë tani. Ai ka shkuar në botën e jashtme, pa vizë, pa letra, dhe të gjitha i ka falas”.

Bojan Dimic: “Asgjë nuk i është nevojitur, ta sigurojë vizën, transportin falas”.

Halit Sahitaj: “Po, ka shkuar në të zezën”.

Bojan Dimic: “Atje akomodimi nuk është i keq”.

Halit Sahitaj: “Batanijen ia kam blerë unë, a e ke dëgjuar këtë? Edhe batanijen, edhe gjithçka, do të kënaqet atje”.

Bojan Dimic: “A e di kur është vetëvrarë një kroat, kur e piu helmin…”

Halit Sahitaj: “Po, po, e di, e di…”

Bojan Dimic: “Po si quhej ai… dhe aty e kanë bërë atë foto, afër tij në anën e tij të majtë Thaçi, në të djathtë Kadri Veseli”.

Halit Sahitaj: “Po, po…”

Bojan Dimic: “Edhe ata po përgatiten për helm, e kupton? Unë për tallje e kam vendosur atë foto në Facebook, me komentin: Le të përgatiten Kadriu dhe Hashimi… kupton?”.

Historia e manipulimit me dëshmitë e rreme të Halit Sahitajt në Hagë, e për të cilat ai thotë të jetë instruktuar nga Faik Imeri, është treguar në dokumetarin “Manipulimi Special”, transmetuar në Opinon/TV Klan dhe Albanian Post-Tiranë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.