Hakerët e lidhur me shtetin në Rusi dhe Iran po synojnë grupe në Mbretërinë e Bashkuar

Hakerët rusë dhe iranianë të lidhur me shtetin po synojnë gjithnjë e më shumë politikanë, gazetarë dhe studiues britanikë.

E gjitha përmes fushatave të sofistikuara që synojnë të kenë akses në email-in e një personi, sipas paralajmërimit të agjencisë britanike të sigurisë në internet.

Qendra Kombëtare e Sigurisë Kibernetike (NCSC) lëshoi një alarm për dy grupe nga Rusia dhe Irani, duke paralajmëruar ata në qeveri, mbrojtje, grupe të ekspertëve dhe media që të mos klikojnë në link-e me qëllim të keq nga njerëz që paraqiten si mikpritës të konferencës, gazetarë apo edhe kolegë.

Të dy grupet kanë qenë aktivë prej disa vitesh, por kohët e fundit kanë rritur aktivitetet e tyre në Mbretërinë e Bashkuar teksa lufta në Ukrainë vazhdon, si dhe operojnë në SHBA dhe vende të tjera të NATO-s.

Ata synojnë të vjedhin sekrete, por jo të zhvatin para.

Paul Chichester, drejtori i operacioneve të NCSC-së, ka thënë se aktorët e kërcënimit me bazë në Rusi dhe Iran nga dy grupet e veçanta “vazhdojnë të ndjekin të pamëshirshëm objektivat e tyre në një përpjekje për të vjedhur kredencialet në internet dhe për të kompromentuar sistemet potencialisht të ndjeshme”.

Zakonisht hakerët kërkojnë të fitojnë besimin e një objektivi duke imituar dikë që ka gjasa të ketë kontakt me ta dhe duke i joshur të klikojnë në një link me qëllim të keq, ndonjëherë gjatë rrjedhës së disa email-eve dhe ndërveprimeve të tjera në internet.

Vitin e kaluar, grupi rus i njohur si Seaborgium ose Cold River u akuzua nga Google-i për hakerim dhe rrjedhje të korrespondencës që përfshinte ish-drejtorin e MI6 Richard Dearlove dhe anëtarë të tjerë të Brexit-it që kërkonin të bllokonin marrëveshjen e daljes nga BE-ja.

Këtë vit, i njëjti grup u akuzua për shënjestrimin e tre laboratorëve të kërkimit bërthamor në SHBA, duke krijuar faqe të rreme hyrjeje për secilin institucion dhe duke u dërguar me email shkencëtarëve që punonin atje për t’i bërë ata të zbulonin fjalëkalimet e tyre.

Megjithëse metoda është një nga teknikat më të vjetra të hakerimit, ajo që i dallon të dy grupet është përpjekja e bërë për të mashtruar objektivat e tyre, duke përfshirë krijimin e “mediave sociale të rreme ose profileve të rrjeteve që imitojnë ekspertë të respektuar”.

Po ashtu edhe ofrimin e ftesave në konferenca të paqena që supozohet se kanë lidhje me objektivat e tyre.

Pasi të kenë kontrollin e një llogarie, hakerët ndonjëherë e përdorin atë për të joshur të tjerët, sepse viktimat do të kenë besim më të madh nëse email-et që dërgojnë janë të vërteta.

Sakaq, të dy grupet besohet se janë të drejtuara nga shteti, të angazhuar në ato që përshkruhen si spiunazh kibernetik, por agjencia britanike nuk ka fajësuar zyrtarisht qeveritë ruse apo iraniane.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.