Grupi Parlamentar i PS-së: Në raundin e katërt do ta propozojmë vetë Presidentin

Grupi Parlamentar i Partisë Socialiste në një deklaratë për mediat ka bërë me dije se në raundin e katërt të votimeve mazhoranca do të propozojë kandidatin për Presidentin e Republikës së Shqipërisë.

“Dy ditë më parë kemi rënë dakord që në raundin e dytë dhe të tretë ne nuk do të propozojmë kandidat dhe i takon opozitës të propozojë”, thuhej në deklaratën e Grupit Parlamentar të PS-së.

Sipas tyre propozimi për President duhet të vijë dhe me firma mbështetëse nga opozita.

“Nëse presidenti nuk zgjidhet në këto dy raunde, në raundin e katërt do ta propozojmë ne. Takimi ka qenë publik dhe kjo është dakordësuar në prani të mediave”, përmbyllej njoftimi i tyre.

Ndërsa kreu i Grupit Parlamentar i Partisë Demokratike, Enkelejd Alibeaj, ka thirrur në mbledhje anëtarët në orën 16:00 të kësaj dite, për të zhvilluar diskutim të thelluar për emrat e kandidatëve që do të propozohen për Presidentin e ri.

Në raundin e dytë dhe të tretë të negociatave me mazhorancën, në total opozita do të prezantojë katër emra. Përkatësisht dy nga grupi i Enkelejd Alibeaj dhe dy të tjerë nga Grupi Parlamentar i Aleancës për Ndryshim dhe Grupi për Demokraci dhe Integrim i Mesila Dodës.

Ndërkohë prej këtyre emrave dy do të zgjidhen nga socialistët. Pas kësaj do të krijohet një grup i përbashkët prej gjashtë anëtarësh, në përbërje të së cilit do të jenë nga PD-ja dhe PS-ja.

Nga ky grup do të dalë një kandidat – i propozuar me firma të përbashkëta PD-PS – që do të dërgohet për miratim në Kuvendin e Shqipërisë.

Kujtojmë se raundi i parë i votimeve u përmbyll pa asnjë kandidat. Raundi i dytë është parashikuar të zhvillohet të hënën e 23 majit. Nga ana tjetër Kushtetua parashikon se procedurat për zgjedhjen e Presidentit duhet të fillojnë jo më vonë se data 23 maj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.