Zëvendësministrja e Bujqësisë në Shqipëri, Ermira Gjeçi, në një konferencë për shtyp ka folur mbi situatën e gripit të shpendëve. Ajo ka njoftuar se, gjatë ditës së djeshme, është konfirmuar një vatër e re në Devoll dhe një në Divjakë.
Në fjalën e saj, Gjeçi shpjegoi që, në zonat e karantinuara, janë të pranishëm veterinerët zyrtarë në monitorim periodik të situatës.
“AKVMB ka vazhduar monitorimin e situatës në të gjithë vendin. Po ashtu AKU ka kryer kontrolle në të gjithë territorin e vendit dhe nuk janë gjetur shkelje”.
Ndërkohë, në vatrat e infeksionit, njofton zëvendësministrja, “po respektohen procedurat e shuarjes së vatrave, po kryhet tamponimi i zonave sipas niveleve të rrezes, po komunikohet risku për fermerët dhe veterinerët e zonave”.
Sipas Ministrisë, vatrat e tjera të infeksionit janë qarqet Durrës, Dibër dhe Korçë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
