“Megjithëse personalisht nuk kam asnjë përgjegjësi në vendimmarrje dhe ia kam shkruar e lënë të dokumentuara vendimet e dëmshme sot deklaroj që jap dorëheqjen si nënkryetare e Partisë Demokratike, duke qenë ky vetëm një prej vendimeve të domosdoshme për demokratët”.
Deputetja e Partisë Demokratike, Grida Duma, përmes një postimi në median sociale Facebook ka njoftuar se ka hequr dorë nga roli i saj si nënkryetare e kësaj force politike.
Sipas saj, PD është në ditët më të vështira dhe traumat e humbjeve të njëpasnjëshme nuk po rikuperohen sepse kryetari, Lulzim Basha i përdor dhe negocion që dështimet e Partisë Demokratike t’i kthehen në fitime të tij.
“Pasi shumica e grupit parlamentar i kërkoi me maturi politike të ndërmarrë akte të përgjegjshme dhe të japë dorëheqjen, Lulzim Basha përdori një pakicë të zhgënjyerish për të goditur deputetë, më të votuarit dhe më përfaqësuesit e Partisë Demokratike”.
Për më tepër, ajo shtoi se Basha ka futur në parti edhe njerëz, të cilët dikur kandidonin me logo partish të tjera dhe thekson se kryetarët e degëve, nuk janë pyetur për vendimmarrjet e kandidimeve në zgjedhjet e pjesshme.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
