Grevës së opozitës në Serbi i bashkohen edhe dy deputete tjera

Marinika Tepiç, nënkryetarja e Partisë për Liri dhe Drejtësi (SSP) dhe bartësja e listës “Serbia kundër dhunës”, në një konferencë për shtyp para ndërtesës së Komisionit Republikan të Zgjedhjeve (RIK), njoftoi të enjten se edhe dy deputete të Kuvendit të Serbisë – Jelena Millosheviç dhe Danijela Grujiç – do të hyjnë në grevë urie derisa të anulohen zgjedhjet.

Opozita e Partisë Progresive Serbe (SNS) dhe presidentit joliberal të Serbisë, Aleksandër Vuçiç, i cili pretendoi një fitore në zgjedhjet e jashtëzakonshme parlamentare, lokale dhe krahinore të 17 dhjetorit, mes akuzave për numrin e madh të parregullsive përgjatë procesit, kanë shpallur grevë urie dhe kanë ngritur tendë brenda ndërtesës së RIK-ut në Beograd.

“Dua të falënderoj të gjithë ata që më mbështesin – jo në patos, por në luftën për anulimin e zgjedhjeve të rreme, dhe që do të më bashkohen në grevë urie edhe dy deputete të tjera – Jelena Millosheviç nga Nishi dhe Danijela Grujiç nga Novi Sadi”,  deklaroi Tepiç, derisa paralajmëroi se grevës do t’i bashkohen kolegë tjerë opozitarë në shenjë mbështetjeje.

Tepiç, bashkë me njërin prej liderëve të koalicionit opozitar, Mirosllav Alleksiç, shpallën grevë urie në ndërtesën e RIK-ut të hënën e 18 dhjetorit, ndërsa qytetarët serbë janë duke protestuar para selisë së RIK-ut në qendër të Beogradit, duke kërkuar anulimin e zgjedhjeve në kryeqytetin serb nën pretendimin se SNS-ja manipuloi rezultatet zgjedhore në Beograd.

Një ekip monitorues ndërkombëtar i përbërë nga anëtarë të Organizatës për Siguri dhe Bashkëpunim në Evropë (OSBE), Parlamentit Evropian (PE) dhe Asamblesë Parlamentare të Këshillit të Evropës (APKE), raportoi për “parregullsi serioze” gjatë zgjedhjeve në Serbi, pasuar nga thirrjet e Bashkimit Evropian (BE) dhe Shteteve të Bashkuara të Amerikës (SHBA).

E besimi i qytetarëve serbë ndaj listës së partisë në pushtet “Aleksandër Vuçiç – Serbia nuk guxon të ndalet”, vetëm konfirmon se perspektiva e demokracisë në Serbi është ende e pasigurt. Gjithashtu, mbetet e paqartë nëse Serbia do të ndjekë politika të favorshme ndaj stabilitetit rajonal.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.