Kosova

Greva në Trepçë, një minatorit i përkeqësohet gjendja: Qeveria s’po ndërmerr veprime për kërkesa minimale


Miniera e Trepçës.

Për shkak të grevës që filloi të martën në minierën e Trepçës, një punëtori i është përkeqësuar gjendja shëndetësore të cilin më pas e kanë dërguar në spitalin rajonal të Mitrovicës.

Lajmin për Albanian Post e ka konfirmuar kryetari i sindikatës së Trepçës, Ibrahim Jonuzi.

“Po, një punëtori i është përkeqësuar gjendja shëndetësore. Aktualisht e kemi një gjendje shumë të rëndë, prandaj s’kemi kontaktuar me spitalin rajonal të Mitrovicës”, ka thënë Jonuzi për Albanian Post.

Ai ka pohuar se kërkesat e punëtorëve janë të qarta.

“Kërkesat tona janë mjaftueshëm të kuptueshme, por e kemi të paqartë se si Qeveria e Kosovës dhe institucionet tjera nuk po ndërmarrin veprime për kërkesa minimale”.

Minatorët e Stantërgut që nga e premtja e deri të martën kanë bojkotuar punën disa herë meqë nuk u janë ekzekutuar pagat për muajin shtator.

Foto: Ilustrim.

Bordi Mbikëqyrës i “Trepçës” u emërua nga Qeveria Kurti në shkurt të 2022.

Ai përbëhet nga Bahri Hyseni – kryesues, Bujar Bilalli, Ibrahim Krasniqi, Muharrem Peci dhe Xhevdet Tahiri, anëtarë të bordit.

Me 8 gusht, Qeveria e Kosovës ka ndarë edhe mbi 1 milion euro për Trepçën.

Punëtoret e Trepçës, së fundmi kishin protestuar për dy ditë radhazi për mos marrjen e pagave të muajit korrik.

Kompleksi metalurgjik Trepça, deri në vitet 90 atëherë kur ishte përkeqësuar situata politike, ishte llogaritur si një prej ndërmarrjeve më të mëdha, jo vetëm në Kosovë, por edhe në territorin e Jugosllavisë së atëhershme.

Rënia e prodhimit ka nisur në vitet 90 kur regjimi i atëhershëm i Serbisë ka vendosur masa të dhunshme në Kosovë, kështu duke mbyllur gati të gjitha ndërmarrjet dhe institucionet në vend.

Ndërmarrja nuk ka arritur asnjëherë të vihet në funksion të zhvillimit ekonomik të Kosovës, por pritet të kalojë nën Fondin Sovran të Qeverisë së Kosovës.

Fond ky i cili do t’i marrë nën pronësi të gjitha asetet strategjike të Kosovës, për të investuar më pas në rritjen e vlerës së tyre, ndërsa miratimi i tij është paraparë që të bëhet brenda vitit 2023.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore