Greqia “e pakënaqur” nga marrëveshja e dronëve Shqipëri-Turqi

Ministri i Jashtëm grek, Nikos Dendias shprehu pakënaqësinë e tij për “afrimin” mes Turqisë fqinje dhe Shqipërisë.

Kjo, pasi të dyja vendet nënshkruan një marrëveshje për tre drone “Bayraktar”.

Lajmi u bë i ditur gjatë një konference të përbashkët për shtyp me kryediplomaten shqiptare Olta Xhaçka.

Dendias theksoi në fjalën e tij praninë e forcave revizioniste që “duan të kthehemi në kohë dhe perceptime të tjera dhe të ndikojmë në Ballkanin Perëndimor”.

“Synimi i tyre nuk është vetëm bashkëpunimi, por krijimi i zonave të influencës, të cilat nuk janë as në përputhje me acquis-në evropiane, as me perspektivën evropiane dhe as me vlerat evropiane”, u shpreh Dendias.

Në fillim të kësaj jave, kryeministri shqiptar Edi Rama vlerësoi presidentin turk Rexhep Tajip Erdogan për ndihmën e tij në nënshkrimin e një marrëveshjeje me një kompani turke për blerjen e tre dronëve Bayraktar, të cilët përdoren gjerësisht në luftën në Ukrainë.

“Ne nënshkruam një kontratë eksporti me Shqipërinë, një vend ku kemi ecur me shekuj dhe ndajmë lidhje të forta historike, kulturore dhe humanitare”, tha në një deklaratë CEO i kompanisë turke të dronëve.

Çfarë janë dronët Bayraktar?

Të lehtë, ekonomikë dhe të manovrueshëm nga distanca.

Emrin, mbajeni mend mirë… Ata quhen Bayraktar!

Lufta në Vietnam, protagonist pati Kallashnikovin, të njohur shkurtimisht si AK-47.

Lufta në Afganistan pati Stinger-in, predhën e famshme kundërajrore, të cilën mund ta përdorte çdokush.

Lufta në Ukrainë, protagonist deri tani, ka pikërisht dronët ushtarakë turq Bayraktar.

Ato, Ukraina i ka blerë nga Ankraja, pikërisht për t’u mbrojtur nga agresioni i Vladimir Putinit, i cili e mori vendimin radikal më 24 shkurt.

Nëse edhe vetëm gjysma e vrasjeve që Kievi pretendon se i ka shkaktuar Ushtrisë ruse (rreth 12 mijë), e gjithë merita – ose të paktën pjesa kryesore e tyre – është e Bayraktar-ëve.

Falë strukturës së tyre, ato mund të kalojnë çdo linjë mbrojtjeje të rusëve dhe të godasin pikërisht aty ku dëshirohet dhe ku më shumë u dhemb kundërshtarëve.

Synimi kryesor deri tani, duket se kanë qenë kamionët e logjistikës, transportuesit, cisternat e ndryshme, apo edhe rrugët e komunikimit.

Ai, teknologjikisht nuk është shumë i avancuar, por efektshmëria që ka e bën të shkëlqeje.

I njohur ndryshe si BT2, Bayraktari është një dron bombardues.

Operatori, i cili e drejton, është në distancë dhe jeta nuk i cenohet. Gjithsesi, kjo nuk do të thotë se ai rri tërësisht jashtë luftës.

Në terma konkretë, me aq sa është vërtetuar nga luftëra apo aksione të mëparshme me Bayraktar-ët, në Etiopi ka një rast kur me një predhë të vetme të dalë nga ai, u vranë 53 persona.

Droni është “i shkathët”, i vogël, ekonomik, mbi të gjitha, letal!

Frenimin e avancimit të Ushtrisë ruse në territorin ukrainas, duhet t’ia dinë atij për falë.

Ai është aq praktik, sa mund të ngrihet në fluturim edhe nga një rrugë e thjeshtë. Kamerat e tij mundësojnë fushëpamje të gjerë.

Një aspekt tjetër interesant, është fakti se ato, i prodhon kompania e dhëndrit të presidentit Recep Tayyip Erdogan.

Debutimin në fushëbetejë e ka pasur në luftën kundër Isis-it në Siri. Më pas, ndaj forcave të Bashaar al-Assad.

Betejat e radhës të Bayraktar-ëve u zhvilluan në Libi. Më tej, në konfliktin në Nagorno-Karabakh, ku i dha fitoren Azerbajxhanit kundrejt Armenisë.

Në Etiopi, shpëtoi Qeverinë nga rrëzimi kundër rebelëve në Tigray.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.