Greqia do t’u japë emigrantëve leje trevjeçare për të trajtuar mungesën e fuqisë punëtore

Ligjvënësit grekë u përgatitën të votojnë të hënën një projektligj që lejon emigrantët të marrin një leje qëndrimi dhe leje pune trevjeçare.

Një hap ky, për të trajtuar mungesën e fuqisë punëtore në sektorët kyç të një ekonomie që po rimëkëmbet nga kriza e borxhit.

Për mijëra emigrantë dhe azilkërkues – nga Lindja e Mesme, Azia dhe Evropa Lindore – Greqia ka qenë një portë për në Bashkimin Evropian.

Dhe shumë prej tyre kanë përfunduar duke punuar ilegalisht, në sektorë si ndërtimi, bujqësia dhe turizmi.

Në vitin 2018, pas daljes nga tre paketat ndërkombëtare të shpëtimit, Greqia – si homologët e tjerë evropianë – u godit edhe nga një eksod i punëtorëve nga fuqia punëtore gjatë pandemisë, shumë prej të cilëve nuk janë kthyer më.

Qeveria konservatore, e cila u rizgjodh në qershor dhe ka ashpërsuar politikën e Greqisë për të frenuar migracionin duke punësuar më shumë roje kufitare dhe duke shtuar patrullat, vlerëson se rreth 300 mijë emigrantë pa dokumente jetojnë në vend.

“Ne nuk duam njerëz të padukshëm”, ka thënë Ministri i Shtetit Akis Skertsos.

Ai ka treguar se leja do të ndihmojë në tërheqjen e punëtorëve për punë që grekët e papunë janë shfaqur të pavullnetshëm për të bërë dhe për të ruajtur rendin publik.

Referuar projektligjit të qeverisë konservatore, emigrantët dhe azilkërkuesit që jetojnë në vend prej të paktën tre vitesh, nuk kanë precedentë penalë dhe u është ofruar një punë, mund të aplikojnë brenda dhjetorit 2024 për lejen e re të qëndrimit.

Partia e kryeministrit Kyriakos Mitsotakis kontrollon 158 vende në parlamentin prej 300 vendesh dhe për këtë arsye projektligji, i cili gjithashtu krijon postin e koordinatorit kombëtar për kthimin e emigrantëve, pritej të miratohej të hënën në mbrëmje.

Rreth 30 mijë njerëz – shumë prej tyre nga Shqipëria, Gjeorgjia, Pakistani dhe Filipinet – ka të ngjarë të aplikojnë për llojin e ri të lejes, kanë thënë zyrtarë të Ministrisë së Emigracionit.

Marrë nga “Reuters”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.