Greqia dërgon trupa mbrojtës në Kosovë

Një numër i ushtarëve të Greqisë do t’i bashkohen KFOR-it në Bondsteel në kuadër të forcës rezervë.

Lajmi është bërë i ditur përmes faqes zyrtare të Shtabi të Përgjithshëm të Ushtrisë së Greqisë.

“Të enjten, më 24 qershor, komanda, shtabi dhe kompania greke e Batalionit të 2-të shumëkombësh të Forcës Rezervë Operacionale, u nisën nga Greqia për në Kampin BONDSTEEL në Kosovë, me qëllim për të ndërmarrë mision të sigurisë, duke kontribuar në aftësinë e reagimit të menjëhershëm të NATO-s në rajonin e Kosovës”, thuhet në njoftim.

Po ashtu nga shtabi është sqaruar edhe përbërja e këtij batalioni.

“Batalioni i II-të shumëkombësh i rezervave operacionale përbëhet nga komanda shumëkombëshe me një staf përkatës, e cila përbëhet nga personel nga Greqia, Shqipëria, Bullgaria dhe Rumania dhe komanda e së cilës deri në dhjetor 2024 mbahet nga vendi ynë, si dhe nga pesë manovra”.

Kjo është hera e dytë që forcat greke vendosen në Kosovë.

Herën e parë ato kishin qenë të pranishme në Kosovë nga shtatori deri në dhjetor të 2023-së, pas sulmit terrorist që kishte ndodhur në Banjë, ku kishte mbetur i vdekur rreshteri i Policisë së Kosovës, tashmë hero i shpallur nga institucionet e Kosovës, Afrim Bunjaku.

Prej pesë shteteve anëtare të BE-së që nuk kanë njohur pavarësinë e Kosovës (Spanja, Sllovakia, Rumania dhe Qipro), shteti grek ka luajtur rolin më bashkëpunues diplomatik, duke lehtësuar lëvizjen e qytetarëve, ngritur nivelin e tregtisë dhe duke dërguar e pritur delegacione qeveritare.

Kërkesa e Kosovës për njohje të pavarësisë ekziston në Athinë prej shumë vitesh.

Qeveria e Greqisë gjithashtu është treguar mjaft e hapur për bashkëpunim, duke pritur delegacione kosovare dhe duke bërë shpesh vizita zyrtare në Prishtinë, megjithatë njohja për Kosovën nuk ardhur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.