Granit Xhaka, vetëm shqiptari i dytë në histori në listën e ngushtë të Topit të Artë

“France Football” zbuloi të mërkurën në mbrëmje listën e ngushtë me 30 emra të nominuar për çmimin prestigjoz të Topit të Artë 2024. Mes emrave të super yjeve të futbollit binte në sy edhe ai i Granit Xhakës, mesfushori shqiptaro-zviceran i Bayer Leverkusen-it.

Xhaka, bëhet kështu vetëm shqiptari i dytë i nominuar në “top 30” për Topin e Artë. Por, kush ishte i pari?

Futbollisti i parë shqiptar që ka qenë i nominuar në 30 kandidaturat për Topin e Artë ishte Sokol Kushta në vitin 1987.

Sulmuesi asokohe luante për Flamurtarin e Vlorës. Karriera e tij do të përfshinte gjithashtu edhe klube si Partizani i Tiranës, Iraklis, Apollon Kalamarias, Olympiakos Nicosia dhe Ethnikos Achnas.

Në listën prej 30 emrash ku u përfshi Kushta, në vitin 1987, do të ishin gjithashtu emra të mëdhenj të futbollit si Ruud Gullit, Gary Lineker, Marco van Basten apo dhe Rudi Voller.

Çmimin e atij viti e fitoi holandezi Gullit me 106 pikë, i ndjekur nga dyshja spanjolle e Real Madrid-it Emilio Butragueno dhe Michel, me përkatësisht 91 dhe 61 pikë.

Kushta përfundoi në vendet e fundit me 1 pikë, po aq sa kishte Voller i Roma-s, Dimitris Saravakos i Panathinaikos-it, Glenn Hoddle i Monaco-s dhe Alessandro Altobelli i Inter-it.

Përsa i përketë Xhakës, ai nominohet pas një sezoni të jashtëzakonshëm me Bayer Leverkusen-in. Graniti iu bashkua “Aspirinave” një vit më parë dhe në vetëm një sezon ai ka arritur formën maksimale.

Me Leverkusen-in, Xhaka arriti të fitonte Bundesliga-n si të pamposhtur, Kupën e Gjermanisë dhe arriti në finalen e Europa League.

Mesfushori luajti një rol të rëndësishëm në rrugëtimin e Zvicrës drejt çerekfinaleve të Euro 2024 këtë verë në Gjermani.

Dhe tani, sezoni i madh i Xhakës është shpërblyer duke u vendosur në 30 emrat e nominuar për Topin e Artë 2024.

Lista e Topit të Artë, Messi dhe Ronaldo jashtë për herë të parë në 21 vite

Tashmë janë zbuluar 30 emrat që do të garojnë për trofeun më prestigjoz individual në futboll, Topin e Artë 2024. Në listë, mungojnë emrat e dy fituesve absolut Lionel Messi dhe Cristiano Ronaldo. Dhe, kjo ndodh për herë të parë në 21 vitet e fundit.

Messi fitoi çmimin e “France Football” për të tetën herë vitin e kaluar, pas heroizmave të tij në drejtimin e Argjentinës drejt fitores së tretë të Kupës së Botës në Katar.

Por edhe pse ai fitoi Kupën e Amerikës me Argjentinën këtë verë, ylli i Inter Miamit, Messi nuk është nominuar për çmimin e vitit 2024.

Rivali i tij i madh Ronaldo gjithashtu është lënë jashtë, pavarësisht se shënoi 44 gola në të gjitha garat për Al Nassr sezonin e kaluar.

Është hera e parë që nga viti 2003 që as Ronaldo dhe as Messi nuk janë nominuar për këtë çmim.

Dyshja e Real Madrid-it, Vinicius Jr dhe Jude Bellingham, janë përfshirë të dy dhe janë ndër favoritët për të fituar pasi luajtën një rol integral në fitimin e La Liga-s dhe Champions League sezonin e kaluar të klubit.

Mesfushori i Manchester City-t dhe i Spanjës, Rodri është një pretendent pas një viti të madh ku ai ndihmoi klubin e tij të fitonte titullin në Premier League.

100 gazetarë nga e gjithë bota janë përgjegjës për votat, duke marrë parasysh “performancën individuale, vendosmërinë dhe impresionimin”, “performancën kolektive dhe historikun” dhe “klasin dhe lojën e ndershme”.

Fituesi do të shpallet më 28 tetor në një ceremoni të veçantë në “Theatre du Chatelet” në Paris.

Lista e plotë për çmimet e Topit të Artë për meshkuj:

Antonio Rudiger – Real Madrid

Kylian Mbappe – Real Madrid

Lautaro Martinez – Inter

Ademola Lookman – Atalanta

Alejandro Grimaldo – Bayer Leverkusen

Dani Carvajal – Real Madrid

William Saliba – Arsenal

Lamine Yamal – Barcelona

Bukayo Saka – Arsenal

Hakan Calhanoglu – Inter

Rodri – Man City

Declan Rice – Arsenal

Harry Kane – Bayern Munich

Cole Palmer – Chelsea

Vitinha – PSG

Vinicius Jr – Real Madrid

Martin Odegaard – Arsenal

Dani Olmo – Barcelona

Florian Wirtz – Bayer Leverkusen

Mats Hummels – Roma

Erling Haaland – Man City

Nicolas Williams – Athletic Bilbao

Granit Xhaka – Bayer Leverkusen

Artem Dovbik – Roma

Toni Kroos – Real Madrid

Jude Bellingham – Real Madrid

Phil Foden – Man City

Ruben Dias – Man City

Federico Valverde – Real Madrid

Emiliano Martinez – Aston VIlla

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.