Gonzato: Matësi i Reformës në Drejtësi, një shoqëri ku nuk ka tolerancë ndaj korrupsionit dhe krimit

Një sistem drejtësie i përgjegjshëm dhe efikas, i cili e afron Shqipërinë akoma më shumë me Bashkimin Evropian është përpjekje kombëtare.

Kështu shprehet ambasadori i Bashkimit Evropian në Tiranë, Silvio Gonzato, i cili takoi një grup studentësh të drejtësisë të Universitetit Luigj Gurakuqi në Shkodër.

Ata sapo kanë përfunduar një trajnim për transparencën gjyqësore, të zbatuar nga projekti i BE-së “Gjyqësia në qendër të vëmendjes”.

“Iu tregova se suksesi i Reformës në Drejtësi varet edhe nga ata, avokatët, gjyqtarët dhe prokurorët e ardhshëm të Shqipërisë”.

Sipas tij, matës për suksesin e reformës është një shoqëri në të cilën nuk ka tolerancë ndaj korrupsionit dhe krimit.

An accountable & efficient justice system that brings🇦🇱closer to the🇪🇺is a national endeavour. As part of our dialogue on justice reform, I met a group of law students of L. Gurakuqi Uni. in Shkodër. They have just completed a training on judicial transparency, implemented … 1/2 pic.twitter.com/YKAkqaG1iT

— Silvio Gonzato (@EUAmbAL) April 13, 2024

Më herët gjatë ditës, Gonzato, i ka kujtuar edhe një herë strukturave shtetërore dhe politikës se duhet të kryejnë detyrat e shtëpisë, duke përmendur luftën kundër korrupsionit, si edhe vijimin e reformave, posaçërisht atë të drejtësisë.

Ai theksoi se duhet shmangur presioni i politikës ndaj institucioneve të drejtësisë, teksa shprehu besimin e tij të plotë në këto organe.

“Jam këtu në Shkodër me studentë të Drejtësisë për të folur për sistemin e drejtësisë, reformën në drejtësi dhe rolin që ka edhe shoqëria civile. Reforma që u ndërmor në vitin 2016 është një reformë që jo vetëm garanton pavarësinë e sistemit të drejtësisë, por siguron që edhe sistemi i drejtësisë të jetë i përgjegjshëm ndaj qytetarëve”.

Kështu përmendi ai fillimisht, përpara takimit.

Më tej, shpjegoi se qëllimi i reformës ishte pikërisht ai që t’u jepte njerëzve besim, besim te institucioni, besimi veçanërisht te drejtësia e Shqipërisë.

“Kjo është ajo që na duhet për të promovuar një mjedis të shëndetshëm biznesi, të sigurohemi që njerëzit të duan të investojnë në Shqipëri, por edhe të sigurohemi që njerëzit të marrin drejtësinë”, përmendi.

Në vijim, mori edhe disa pyetje, të cilat i shtjelloi:

Pyetje: A po ndikojnë rastet e korrupsionit?

Mendoj se është shumë e rëndësishme që, institucioni i posaçëm që u krijua pikërisht për t’u marrë me rastet e nivelit të lartë të korrupsionit dhe krimit të organizuar, tani po sjell disa rezultate.

Mendoj se i jep besueshmëri vendosmërisë së Shqipërisë për të luftuar korrupsionin, sepse korrupsioni është i dëmshëm për shoqërinë, është i dëmshëm për ekonominë, kështu që nëse Shqipëria dëshiron të anëtarësohet në Bashkimin Evropian, është e qartë rruga që duhet ndjekur. Ky duhet të jetë një nga prioritetet e Shqipërisë dhe duhet të çojë në rezultate konkrete. Pra, e dini, unë kam besim në sistemin e drejtësisë shqiptare. Mendoj se thjesht duhet ta lëmë të bëjë punën e vet dhe të shohim se në çfarë do të sjelle.

Si po e përballon SPAK presionin e madh të politikës?

Shikoni, reforma e 2016-ës synonte konkretisht të garantonte që sistemi i drejtësisë të jetë i pavarur, të jetë i vetëqeverisur dhe prandaj është rezistent dhe elastik ndaj presioneve politike. Kështu që unë i diskutova këto gjëra edhe me z. Dumani dhe ai është i bindur, po bën punën e tij dhe mendoj se duhet të qëndrojë i qetë dhe të vazhdojë.

A ka presion nga politika?

Nuk më takon mua ta them, por ai (Dumani) nuk duket se ishte i shqetësuar për këtë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.