![](https://albanianpost.com/wp-content/uploads/2022/05/Sali-Berisha-01-foto-Facebook-e1533670553146.jpg)
Kreu i Partisë Demokratike, Sali Berisha, ka bërë një deklaratë, ku pretendon se gjysma e ushtarëve të Forcave të Armatosura të Shqipërisë, kanë dorëzuar dorëheqjen nga komandat e tyre.
Shkak, sipas Berishës, është fakti se ata kanë rroga shumë të ulëta dhe kushte të papërshtatshme pune.
“Oficerë madhorë të Ushtrisë punojnë pasdite në bare dhe restorante, për të plotësuar rrogat e ulëta që marrin”, shkruan Berisha në Facebook.
Nga ana tjetër, ai hedh akuza të shumta edhe mbi përballimin e situatave të emergjencës civile në vend, duke thënë se “helikopterët nuk ngrihen dot në ajër, ndërsa anijet e flotës detare nuk janë në gatishmëri”.
“I bëj thirrje NATO-s të ndërmarrë një inspektim për vlerësimin e gjendjes tejet të rëndë të Forcave të Armatosura të një vendi anëtar të saj”, vijon më tej ai.
Mbi pretendimet, ndërkaq, thotë se i kanë ardhur nëpërmjet një denoncimi nga një oficer i Ministrisë së Mbrojtjes.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com