Gjykata Supreme e Kosovës i ka dhënë dritën e gjelbër Komisionit Qendror të Zgjedhjeve (KQZ) që të certifikoj Shaqir Totajn e Partisë Demokratike të Kosovës (PDK) si Kryetar të Prizrenit.

Në përgjigjen që Gjykata Supreme i ka kthyer KQZ-së përkatësisht kryesuesit Kreshnik Radoniqi, thuhet se deri sot (1 dhjetor), në orën 11:00, nuk kanë pranuar asnjë ankesë në lidhje me këtë temë dhe, rrjedhimisht, KQZ është e lirë që të certifikoj Totajn si kryetar të ri.

Gjithashtu, përveç Prizrenit në letrën e Gjykatës Supreme lejimi i njëjtë vlen edhe për qytezën e Kllokotit.

E tërë shtyrja për komunën e Prizrenit kishte ndodhur pasi që Lëvizja Vetëvendosje (LVV) ishte ankuar në Panelin për Zgjedhor për Ankesa dhe Parashtresa (PZAP) për parregullsi, ankesë e cila i ishte kthyer mbrapa nga ky organ shqyrtues.

Shaqir Totaj nuk është certifikuar ende nga KQZ për shkak të pritjes se mos një ankesë e tillë ka shkuar edhe në Gjykatën Supreme.

Supremja ka treguar se një gjë e tillë nuk ka ndodhur dhe KQZ mund të vazhdojë me procedurat e saj.

Totaj pritet që brenda këtyre ditëve të certifikohet si Kryetar i ri dhe të nisë punën në drejtimi ne Prizrenit.

Ndërsa Komisioni Qendror i Zgjedhjeve në një njoftim për media ka bërë të ditur se do të mbajë një mbledhje të mërkurën e një dhjetorit me fillim në ora 15:00, ku në rend të ditës është parapa të bëhet certifikimi i rezultateve përfundimtare të raundit të dytë të Zgjedhjeve për Kryetar të Komunës së Prizrenit dhe Kllokotit.

Shaqir Totaj nga Partia Demokratike e Kosovës (PDK) kishte fituar zgjedhjet lokale në rundin e dytë në qytetin e dytë më të madh në Kosovës, atë të Prizrenit, pas një gare të ngushtë e cila ndryshonte shumë shpesh gjatë numërimit të votave duke vënë njërin kandidat në epërsi kundrejt tjetrit.

Shaqir Totaj me të numëruar 100% të votave, kishte morë 51,01% ose 27 mijë e 17vota.

Edhe EXIT POLL-i i Albanian Post e ka nxjerrë fitues Shaqir Totajn e PDK-së.

Kandidati i Partisë Demokratike të Kosovës për kryetar të Prizrenit, Shaqir Totaj, sipas EXIT POLL-it të Albanian Post është duke udhëhequr me 50.5% të votave ndaj kundërkandidatit nga Lëvizja Vetëvendosje, Mytaher Haskuka i cili ka marrë 49.5 %.