Gjykata Speciale shpall Gucatin e Haradinajn fajtorë – 4 vjet e gjysmë burgim

“Në emër të popullit të Kosovës, duke marrë parasysh të gjitha provat, trupi gjykues ju shpall fajtorë”.

Kështu është marrë vendimi për dënimin e Hysni Gucatit dhe Nasim Haradinajt nga Gjykata Speciale.

Ata janë shpallur në disa pika fajtorë, por jo edhe për pikën e aktakuzës “hakmarrje”.

Dënimi, nga gjashtë vjet sa kishte kërkuar prokuroria, është dhënë për 4 vjet burgim.

“Të akuzuarit vazhduan të shpërndajnë në shkallë të gjerë informacionin e mbrojtur që përfshinte emrat e qindra dëshmitarëve të mbrojtur. Ata e bënë këtë në mënyrë të përsëritur dhe me entuziazëm”, ka thënë kryetari i trupit gjykues, Charles Smith, në leximin e vendimit.

“Të akuzuarit nuk menduan për pasojat e mundshme të veprimeve të tyre. Ata vepruan haptazi duke shpërfillur vendimet e kësaj gjykate. Trupi gjykues konstaton se nuk ka fajtorë të tjerë rëndues. Trupi gjykues konsideron si faktor lehtësues situatën familjare dhe gjendjen e tyre shëndetësore”.

“Trupi gjykues është bindur se të akuzuarit vepruan me synim të drejtpërdrejt të zbulimit të informacionit të mbrojtur”, tha ndër të tjerash kryetari i këtij trupi.

Ai tha se “veprat e të akuzuarve shkaktuan pasoja të rënda”, duke përmendur dy dëshmitarë, që tha se “u zhvendosën”.

Specialja akuzonte Gucatin e Haradinajn për vepra penale “kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës”.

Ata u shpallën fajtorë për katër pika të aktakuzës, derisa u shpallën të pafajshëm në një pikë.

“Për arsyet e shtjelluara në aktgjykim dhe të përmbledhura më lartë dhe duke marrë parasysh të gjitha provat dhe argumentet e palëve, trupi gjykues në bazë të neneve 43 dhe 44 të ligjit dhe rregullave 158 dhe 159, 163, 165 të rregullores, ju shpall ju fajtorë për, pikën 1: pengim të personave zyrtarë në kryerjen e detyrës zyrtare nëpërmjet të kërcënimit të rëndë, pika 2: Pengim të personave zyrtarë në kryerjen e detyrave zyrtare nëpërmjet pjesëmarrjes në veprime të përbashkëta, pika 3: frikësim gjatë procedurës penale, pika 5: Shkelje të fshehtësisë së procedurës nëpërmjet zbulimit të paautorizuar të informacionit të fshehët, pika 6: shkelje të fshehtësisë së procedurës nëpërmjet zbulimit të paautorizuar dhe identitetit të dëshmitarëve të mbrojtur. Gjykata nuk ju shpall fajtorë për pikën 4: hakmarrje”.

Si filloi…

Në shtatorin e vitit 2020 Organizata e Veteranëve të Luftës filloi të mbante seanca të jashtëzakonshme për media. Ata pritën mediat në selinë e tyre me një mal me dokumente në tavolinë. Kur konferenca filloi treguan se dikush, ende i panjohur për ta, po u sjell dosje, të cilat pasi i kanë shfletuar kanë kuptuar se mund të jenë të Gjykatës Speciale.

OVL vetë nuk kishte publikuar asnjë dokument, sepse e kuptonin se ishte ndërhyrje në rastet që tashmë kishin filluar për bashkëluftëtarët e tyre në Hagë, porse ua ofronin mediave për publikim, nëse shprehin interesim.

Megjithatë, në OVL tregonin se bëhej fjalë për mijëra dokumente, se ato mund të jenë të Speciales dhe se një pjesë e mirë e dokumenteve ishte në gjuhën serbe – çka, sipas tyre, betonizonte argumentin që kishin edhe më herët: se Gjykata Speciale është një krijesë krejtësisht e mbështetur në dëshmi te falsifikuara të shteti serb.

“Veç tua tregoj edh dy tri fletë që janë në gjuhën serbe”, deklaronte Gucati në konferencë.

“Kemi në gjuhën angleze që kanë bashkëpunuar prokurorët serbë me Gjykatën Speciale, një prej tyre është zv. Prokurori i Gjykatës Speciale të Serbisë Stankoviç-i që ka tubu dosje dhe argumente që gjoja se shqiptarët kanë kryer krime lufte. Tjetri është drejtor gjeneral i policisë në Serbi në bashkëpunim me prokuror të gjykatës, desha veç këto dyja, se nuk kemi pas kohë me i kontrollu, jemi mundu me i kontrollu, nuk ka emra e mbiemra të dëshmitarëve”, thoshte atëherë Gucati.

Konferencat kishin vazhduar. Në një moment, OVL kishte publikuar edhe një video ku tregohej se si një person i maskuar, në mes të ditës, futej brenda selisë së tyre dhe lëshonte pako me dokumente. Në një rast, për pak u kishte ikur pa e zënë.

Sot e atë ditë nuk dihet kush ishte shpërndarësi misterioz i këtyre dokumenteve. Ishte misterioze edhe në i takonin Speciales apo jo. Por, ky mister, ndryshe nga i pari, u zgjodh shpjet, pasi nga gjykata intervenuan me bastisje të zyrës së tyre, arrestime dhe në fund gjykim për dy udhëheqësit e organizatës.

Sa i përket rrjedhjes së dokumenteve nga vetë gjykata, asnjëherë nuk ka filluar një hetim.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.