Ministri i Punëve të Jashtme e Serbisë, Marko Gjuriç, të martën, ka njoftuar se ka realizuar një bisedë telefonike me homologun e tij austriak, Alexander Schallenberg, ku me ç’rast është diskutuar edhe për gjendjen e komunitetit serb në Kosovë dhe mbarëvajtjen e dialogut.

“Gjuriç e njoftoi Schallenberg për situatën aktuale në dialogun ndërmjet Beogradit dhe Prishtinës, si dhe për pozitën shqetësuese të serbëve në Kosovë, të cilët vazhdimisht janë të ekspozuar ndaj presionit, detyrimit dhe kushteve të padurueshme të jetesës për shkak të akteve të njëanshme të Prishtinës”, citohet të ketë thënë Gjuriç.

Gjatë bisedës telefonike, siç njofton mediumi serb me seli në Kosovë, Kosovo Online, është diskutuar edhe për marrëdhëniet ndërmjet Serbisë dhe Austrisë.

“Serbia i kushton rëndësi të madhe zhvillimit të mëtejshëm të marrëdhënieve të gjithanshme me Austrinë, të cilën Serbia e konsideron si një nga partnerët më të fortë brenda Bashkimit Evropian, nënvizoi gatishmërinë e palës serbe për të thelluar dialogun politik në të gjitha nivelet dhe të vazhdojë të përmirësojë bashkëpunimin dypalësh”.