Lajme

“Gjobat antiCOVID janë të jashtëligjshme”


Ilustrim

Shqiptimi i gjobave për masat antiCOVID nga ana e Policisë së Kosovës, po konsiderohen të jashtëligjshme.

Kështu së paku po konsideron njohësi i çështjeve të sigurisë, Nuredin Ibishi. Ndërkaq, qytetarët shqiptimin e gjobave po i konsiderojnë shumë të larta.

Ibishi, konsideron se në asnjë vend të botës, qytetarët nuk gjobiten për këtë çështje.

Ai thotë se këtë duhet ta bëjnë zyrtarët e Inspektoratit Shëndetësor, e assesi zyrtarët policorë.

“Realisht jemi në një gjendje shumë të rënduar të shëndetit publik, gjegjësisht sigurisë shëndetësore, dhe kur në një kohë nga institucionet u liruan në mënyrë të pakontrolluar lëvizjet, tubimet, dhe përnjëherë reaksionet, mendoj e kanë sjellë këtë gjendje”, tha Ibishi.

“Çështja tjetër është e papranueshme që Policia t’i shqiptojë këto gjoba, askund në botë nuk ka që Policia t’i shqiptojë gjobat e një shërbimit tjetër. Policia e kryen punën e asistentit, do të thotë i asiston zyrtarëve të Inspeksionit Shëndetësor. Policia po e krijon një imazh të keq për vetën, por njëkohësisht edhe për vetë punën që e bën, për arsye krijon një mangësi në kryerjen e rregullt të detyrave të veta, siç e ka sipas ligjit të policisë”, shtoi Ibishi.

Teksa ka folur për këtë çështje, Ibishi fton qytetarët që t’i respektojnë masat anti-Covid.

“Mendoj se Ligji si i tillë duhet të zbatohet, ai është miratuar nga Kuvendi dhe duhet të zbatohet. Mendoj se më shumë duhet të merremi me vetëdijesim, e më pak me gjoba”, u shpreh ai për EO.

E qytetarët po i konsiderojnë të larta gjobat anti-covid. Ahmet Bala nga Prishtina thotë se gjoba duhet të ketë por jo kaq të mëdha.

“Gjobat janë por janë pak të mëdha, njerëzit papunë janë, por më mirë them se duhet me qenë këto dënime por jo kaq të mëdha. ‘Më tregojë dikush se e kanë dënuar me një gjobë prej 200 eurosh”, tregon qytetari, teksa thotë se ai nuk është dënuar asnjëherë.

Ndonëse nuk është gjobitur asnjëherë, Arsim Nuhiu thekson se ato po i respekton me aq mundësi që ka.

“Por masat duhet të zbatohen nga secili. Nuk jam gjobitur asnjëherë dhe sa po mundem po i respektoj”, tregon ai.

Më 12 shtator, Qeveria e Kosovës ka miratuar masat e reja kundër pandemisë COVID-19 ku mësimi në nivelin parauniversitar, përfshirë edhe nivelin parashkollor dhe puna e qëndrimeve ditore janë pezulluar deri më 26 shtator.

Ndërkaq në institucionet publike dhe private të arsimit universitar mësimi nuk do të mbahet me prezencë fizike të studentëve.

Kufizimi i qarkullimit të qytetarëve vazhdon të jetë nga ora 22:00 deri në 05:00.

/Albanianpost.com


Lajmet kryesore