“Gjoba 3 milionëshe ndaj KEK-ut lidhet me vargun e keqpërdorimeve në sektorin energjisë nga Martin Berishaj dhe Nagip Krasniqi”

Gjoba prej 3 milionë e 200 mijë euro për Korporatën Energjetike të Kosovës nga Zyra e Rregullatorit për Energji, ia ka përforcuar bindjen kryetarit të Komisionit për Ekonomi nga radhët e Partisë Demokratike të Kosovës, Ferat Shalës dhe anëtarit të këtij komisioni nga radhët e Aleancës për Ardhmërinë e Kosovës, Pal Lekajt, se bën pjesë në “vargun e keqpërdorimeve” në sektorin e energjisë të ambasadorit të Kosovës në Kroaci, Martin Berishaj dhe ish-drejtorit të KEK-ut, Nagip Krasniqit.

Gjoba ndaj KEK-ut, sipas Shalës nga PDK-ja, ka ndodhur pasi dyshohet për keqmemaxhim në import dhe eksport të energjisë elektrike.

“Është e konfirmuar që rregullatori ka marr masat e para në drejtim të ndëshkimit të KEK-ut për shkeljet që kanë ndodhur gjatë vitit 2022, kur ishte drejtor Nagip Krasniqi”, tha Shala.

Sipas tij, të gjeturat e Zyrës së Rregullatorit i konfirmojnë pretendimet që ka pasur keqmenaxhim dhe shkelje ligjore në KEK, derisa shprehet i bindur që për keqpërdorime ka informacione edhe ministrja e Ekonomisë, Artane Rizvanolli, e cila tha të hënën e 7 majit se “s’kam informatë zyrtare”.

“Ministrja ka informacion edhe më të plotë se sa unë, sepse e ka obligim. Ajo është në pozitë të palakueshme se këto të gjeturat janë përgjegjësi edhe të ministres”, shtoi ai.

Në një linjë me Shalën është edhe Lekaj nga AAK-ja. Ky i fundit mendon se rasti i fundit është një argument plus për gjykatat që në KEK kjo qeveri “ka keqpërdorur paranë publike”.

“Janë dëmtuar qytetarët e Kosovës me rritje të faturave të energjisë, pagesë të energjisë në Komunat veriore, si dhe reduktime të vazhdueshme”, thekson ai.

Lekaj, thotë se përveç KEK-ut, edhe ZRRE-ja dhe bordi i saj i emëruar nga kjo Qeveri, “nuk kanë mbrojtur interesin e qytetarëve të Kosovës”.

“Madje në vazhdimësi kemi kërkuar shkarkimin e Bordit të ZRRE-së por që shumica parlamentare dhe ekzekutivi s’kanë dashur të dëgjojnë për këtë kërkesë opozitare”.

Gjoba e ZrRE-së

Ndryshe, me 5 maj, Bordi i Zyrës së Rregullatorit për Energji në seancën e katërt me radhë për këtë vit, pas shqyrtimit përfundimtar të raporteve të monitorimit, ka vendosur gjobë në vlerën prej 3 milionë e 200 mijë euro për Korporatën Energjetike të Kosovës (KEK), dhe 439 mijë euro për Operatorin e Sistemit të Transmetimit dhe Tregut (KOSTT).

Siç thuhet në komunikatën e tyre për media në këtë seancë, janë aprovuar kërkesat për vazhdimin e Licencës për furnizim me energji elektrike “të ndërmarrjes Future Energy Trading and Exchange Dynamics dhe Licencës për furnizim me shumicë (tregtim) të energjisë elektrike të ndërmarrjes Danske Commodities Kosova, si dhe është miratuar kërkesa për dhënie të Licencës për furnizim me energji elektrike të ndërmarrjes Sharrcem”.

“Po ashtu në këtë seancë, Bordi ka shqyrtuar dhe miratuar propozimin për korrigjimin e vendimeve V_1680_2023 dhe V_1681_2023 lidhur me kontestin e ngritur nga Operatori i Sistemit të Transmetimit dhe Tregut (KOSTT) ndaj Operatorit të Sistemit të Shpërndarjes (KEDS) dhe Furnizuesit me Shërbim Universal (KESCO)”, thuhet aty.

Dallaveret e Nagip Krasniqit: I siguroi kundërligjshëm kompanisë greke tender prej 1 milion e 600 mijë eurove

“Dallaveret e Nagipit”

Më 19 prill, ish-drejtoi i KEK-ut, Nagip Krasniqi, ishte arrestuar nën dyshimin se keqpërdori në një tender prej 3.4 milionë euro me kompaninë “Litwin SA” dhe partnerin vendor “Bujar B. Shala B.I.”, për tenderin rreth kryerjeve të punëve për remontin e turbinës dhe gjeneratorit të Njësisë A5 të TC “Kosova A”.

Ndërkaq Bordi i Drejtorëve të Korporatës Energjetike të Kosovës (KEK), me efekt të menjëhershëm vendosi për pezullimin e Krasniqit nga detyra.

Emri i Krasniqit, u përmend edhe në rastin e skandalit financiar të ambasadorit të Kosovës në Kroaci, Martin Berishaj.

Ky i fundit u raportua se ishte takuar në Kroaci me Krasniqin gjatë muajit mars të vitit të kaluar.

Megjithatë, këtë e kishte mohuar Berishaj gjatë raportimit të tij në Komisionin Hetimor për Energjinë në Kuvendin e Kosovës më 17 nëntor të vitit të kaluar.

“Nuk kam pasur takim me kryeshefin e Korporatës Energjetike të Kosovës. Unë gjitha takimet fillimisht i bëjë në ambasadë. Jam shumë i gëzuar që kam pas mundësin ta shpjegoj një shpifje të madhe që është bërë”, pati thënë Berishaj.

Më 2 dhjetor të vitit të kaluar, Krasniqi ishte ftuar për të raportuar para Komisionit Hetimor Parlamentar i Kosovës në lidhje me procesin e vendimmarrjes në sektorin e energjisë për periudhën 2006-2022.

Por, e kishte lëshuar mbledhjen pas pyetjes së kryetarit të këtij komisioni, Hajdar Beqa, i cili kishte kërkuar informacione nga Krasniqi për mos fillimin e remontit të bllokut A5 në Termocentralin “Kosova A”.

Ndryshe, të hënën Gjykata e Apelit ka vendosur lidhur me ankesën e mbrojtjes së kryeshefit të pezulluar të Korporatës Energjetike të Kosovës (KEK), Nagip Krasniqi, të cilët kanë kërkuar lirimin e tij nga paraburgimi.

Megjithatë, kjo kërkesë është refuzuar nga Apeli, duke e lënë Krasniqin në paraburgim.

Dallaveret e Nagip Krasniqit – i dha tender kundërligjshëm avokatit të tij, shpalli tender njëburimor për shërbime që veçse i ofronte zyra ligjore brenda KEK-ut

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.