Gjithçka për gjithçka – Hamilton dhe Verstappen përballë ‘gjykimit’

Max Verstappen dhe Lewis Hamilton përballen me njëri-tjetrin në finalen për titullin kampion të vitit 2021 në Abu Dhabi.

Kjo fundjavë, mund të konsiderohet si një ndër luftërat më të intensive për titullin në historinë e sportit më të shpejtë në botë.

Dhe nëse nuk është më intensivi – Ayrton Senna përballë Alain Prost në vitet 1989 dhe 1990, kur dy herë pilotët u përplasën me njëri tjetrin, atëherë definitivisht është shumë afër nivelit të tyre.

Është hera e dytë në histori që të dy pilotët në luftë për titullin i drejtohen garës së fundit me pikë të barabarta.

Hera e parë ndodhi në vitin 1974.

Është hera e parë që nga viti 2012 që dy pilotë të skuadrave të ndryshme titullin e vendosin në garën e fundit.

Hamilton dhe Verstappen vijnë në shfaqjen e fundit të një sezoni të mbushur me inate mes njëri tjetrit, një sezoni ku të dy shtynë deri në limite – dhe diçka më shumë.

Verstappen dhe Hamilton janë përplasur në pistë tri herë këtë sezon, dhe kanë garuar në mënyrën më të ashpër të mundshme në shumë raste tjera.

Deri sa gjatë gjithë vitit, pakënaqësitë ishin të limituara në luftë fjalësh dhe ‘lufta’ në prapaskena mes drejtuesve të skuadrës, Wolff dhe Horner.

Por, në garën e javës së kaluar në Arabi, Verstappen dhe Hamilton më në fund shpërthyen ndaj njëri-tjetrit në garë duke shkaktuar shumë momente kontraverse dhe mini-aksidente.

Gjatë asaj gare, Hamilton e quajti të “çmendur” rivalin e tij Verstappen, duke thënë pas saj se ai piloti sikur nuk ka rregulla në këtë sport.

Verstappen u penalizua dy herë – njëherë pasi e parakaloi britanikun jashtë limiteve të pistës, dhe një herë për “pilotim të rrezikshëm” kur ai frenoi shumë me Hamilton-in që ishte prapa tij, gjë kjo që rezultoi në një aksident mes të dyve.

Gjatë gjithë kësaj, Hamilton erdhi nga prapa për ta parakaluar Verstappen-in dhe për të fituar për herë të tretë radhazi, duke barazuar gjithçka sa i përket pikëve.

Tani, në garën e fundit, fituesi i merr të gjitha.

Matematikat e titullit

Verstappen dhe Hamilton janë të barazuar me pikë – nëse dy të përfundojnë garën, ai që e kalon vijën i pari shpallet kampion.

Nëse është Hamilton, do të jetë titulli i tij i tetë, një rekord i ri, duke e vënë atë një titull para Michael Schumacher, me të cilin është i barazuar tani.

Nëse është Verstappen, do të thotë që është titulli i tij i parë dhe fundi i një dominimi shtatë vjeçar të Mercedes-it.

Por, nuk është aq e thjeshtë.

Edhe pse janë të barazuar me pikë, Verstappen është ende lider i kampionatit pasi ai ka nëntë fitore në krahasim me nëntë të Hamilton. Kjo do të thotë që nëse në rast se asnjëri nuk e përfundon garën, atëherë holandezi shpallet kampion.

Ideja e një aksidenti që vendos titullin është bërë një bisedë e përditshme në Formula 1 për disa kohë tani, sidomos duke marrë parasysh se sa të shpeshta kanë qenë duelet e ashpra mes dy garuesve.

Luhet për gjithçka, andaj gjithçka pritet të ndodhë gjatë garës të dielën.

Jehonat e historisë

Në vitin 1994 dhe 1997, Schumacher u përplas dy herë me rivalët e titullit, në të dy garat ai do të shpallej kampion nëse asnjëra nga makinat nuk e përfundonte garën.

Në vitin 1994, në Adelaide, funksionoi. Schumacher goditi Williams-in e Damon Hill, dhe doli jashtë garës – por e njëjta ndodhi edhe për Hill, që nuk mundi të vazhdonte garën për shkak të një problemi në gomën e përparme. Gjermani fitoi në atë mënyrë titullin e tij të parë kampion.

Në vitin 1997, në Jerez, nuk funksionoi. Schumacher goditi Williams-in e Jacques Villeneuve dhe Ferrari i tij doli nga gara. Villeneuve vazhdoi edhe pse me probleme, dhe përfundoi i treti duke u shpallur kampion.

Të dy incidentët gjithmonë do të mbesin në anën e errët të karrierës së gjermanit historik.

Verstappen e di këtë. Në vitin 2019, ai ishte pyetur në një intervistë pikërisht për këtë gjë.

“Nëse duhet të prekë, do të prekë. Parakalimi nuk duhet të jetë gjithmonë në mënyrën më të pastër”, u shpreh Max.

“Ta them kështu”, vazhdoi ai, “pas karrierës, nëse unë kam fituar pesë tituj kampionë dhe nuk jam personi më i dashur, për mua nuk ka rëndësi. Në fund të fundit, gjithçka bëhet për fituar”.

“Ndoshta tingëlloj arogant, por nuk dua të dukem ashtu”, vazhdoi Max.

“Do të bëj gjithçka që të fitoj, nëse është pak, jo në mënyrë josportive, por në mënyrë të ashpër, do ta bëj. Nuk jam këtu që të jem personi më i pëlqyer”.

Në pyetjen se cila është diferenca mes ‘josportives’ dhe ‘të ashpër’, Max u pergjigj duke thënë: “Josportive është kur e bën me qëllim”.

“Do të përmendja rastet kur Schumacher e goditi Hill-in dhe Villeneuve-n”, u shpreh holandezi.

“Këto dy incidente e tejkaluan linjën. Por një luftë e ashpër, të ketë prekje është në rregull – nëse lufta shkon deri në limitet e kthesës”.

“Mirëpo”, vazhdoi ai, “nëse dikush është duke parakaluar, unë nuk do ta godasë që të dy të dalim nga gara; ai është një mentalitet ndryshe”.

RedBull, që për herë të fundit e fituan titullin me Sebastian Vettel në vitin 2013, dëshpërimisht kërkojnë fitoren këtë javë.

Mirëpo, Horner shprehet se rëndësi ka edhe mënyra se si ata fitojnë.

“Dua ta fitojmë në pistë”, thotë ai, “jo në dhomën e drejtuesve të garës, jo në një anksident”.

“Ka qenë një luftë e vështirë”, tha ai, “gjatë gjithë vitit. Kemi pasur gara fantastike, shpresoj që Abu Dhabi të jetë e njëjtë”.

Diferenca është që Max Verstappen dhe Lewis Hamilton – Totto wolf dhe Christian Horner, kanë pikëpamje të ndryshme se çfarë është “e drejtë”.

Prandaj duke iu afruar kësaj fundjave, gjithçka mbetet në “ajër”.

Hamilton apo Verstappen, Mercedes apo RedBull, Wolff apo Horner – gjithçka për gjithçka, të gjithë tani janë përballë “gjykimit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com