Gjermania ka zbuluar probleme serioze me tanket e saj “Puma BMP”

Bundeswehr-i (Forcat e Armatosura gjermane) zbuloi probleme të shumta me mjetet luftarake të këmbësorisë “Puma”, të cilat do të përdoreshin nga forcat e reagimit të shpejtë të NATO-s.

Këtë e ka raportuar fillimisht botimi Spiegel duke iu referuar raportit të marrë nga komandanti i divizionit të 10-të të tankeve, i ndjekur nga media të tjera gjermane, përfshirë “FAZ” dhe “DPA”.

Një stërvitje me zjarr të drejtpërdrejtë që përfshin 18 tanke “Puma BMP” në javët e fundit ka treguar një sërë problemesh teknike dhe është bërë një çështje kryesore për Ministrinë e Mbrojtjes që nga e premtja.

Kjo, pasi ato do të vendosen si pjesë e forcës së reagimit të shpejtë të NATO-s nga viti tjetër.

Makineritë që janë në shërbim me brigadën e 37-të tank-grenadier filluan të dështojnë pas disa ditësh, ndërsa tanket Leopard-2 nuk kishin probleme të tilla.

Në letër thuhet se të 18 BMP-të ishin jashtë funksionit gjatë tetë ditëve të trajnimit – për shkak të keqfunksionimeve të ndryshme teknike.

Shumica e problemeve lindën me elektronikën. Siç shkruan komandanti, ushtria e dinte që mund të lindnin probleme të tilla, por nuk ndodhi kurrë në përmasa të tilla dhe nuk pritej, sepse pajisjet nuk ishin të mbingarkuara.

80-90 për qind e Leopard-2, nga ana tjetër, mbetën funksionale dhe problemet e vogla mund të eliminoheshin në më pak se një ditë.

“Puma BMP” është projektuar dhe prodhuar nga Krauss-Maffei Wegmann (KMW) dhe Rheinmetall Landsysteme GmbH dhe fillimisht u konsiderua si një teknologji shumë e avancuar, por më vonë filluan të shfaqen probleme të ndryshme teknike.

Inspektori i Përgjithshëm i Bundeswehr-it, Eberhard Zorn, tha se së bashku me specialistët e industrisë së mbrojtjes do të bëhet një vlerësim i menjëhershëm i dëmtimit të pajisjeve dhe shtoi se Gjermania do të jetë e gatshme të përmbushë detyrimet e saj në kuadër të NATO-s në çdo rast.

Në forcat e reagimit të shpejtë, ato tani mund të zëvendësohen nga Marders më të vjetër, por më të besueshëm.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.