Gjermania dëshiron të tërheqë më shumë infermierë nga Brazili

Qeveria gjermane po planifikon të tërheqë më shumë infermierë nga vende me potencial të fuqishëm të fuqisë punëtore.

Fokusi i radhës është në Brazil.

Ministri Federal i Punësimit i Gjermanisë, Hubertus Heil dhe Ministrja Federale e Jashtme Annalena Baerbock do të udhëtojnë në Brazil muajin e ardhshëm për të arritur një marrëveshje me autoritetet e kësaj të fundit.

E gjitha kjo për të bërë të mundur që më shumë infermierë të arrijnë atje për qëllime pune.

Sakaq, pas përfundimit të marrëveshjes pritet që një numër më i madh infermierësh nga Brazili të mund të hyjnë në Gjermani.

Megjithatë deri më tani autoritetet nuk kanë zbuluar ende ndonjë shifër.

“Qeveria gjermane dëshiron të tërheqë më shumë infermierë nga vendet me potencial të fuqishëm të fuqisë punëtore. Për këtë qëllim, Ministri Federal i Punësimit Hubertus Heil dhe Ministrja Federale e Jashtme Annalena Baerbock do të udhëtojnë në Brazil në qershor për të përfunduar marrëveshjen e nevojshme”, thuhet në deklaratë.

Tanimë, Gjermania ka arritur një marrëveshje për rekrutimin e infermierëve me Meksikën dhe Indonezinë.

Në fillim të shkurtit të këtij viti, ministri Heil ka udhëtuar për në Ganë, ku ka diskutuar për mundësitë e rekrutimit edhe për qytetarët e këtij vendi.

Duke zbuluar planet e vendit, Heil ka thënë se Gjermania po punon me biznese të ndryshme për të zbatuar strategji rekrutimi në vendet që kanë më shumë të rinj të arsimuar.

Më tej ai ka thënë se vendi “do ta bëjë këtë me shumë ndjeshmëri në mënyrë që të mos largojë punëtorët nga çdo vend që ka nevojë për ta”.

Gjermania ka disa vite që po përpiqet të rekrutojë infermierë dhe punëtorë të tjerë shumë të kualifikuar nga jashtë.

Qeveria shpreson që Akti i Migrimit të Punëtorëve të Aftë do të tërheqë më shumë njerëz në Gjermani dhe vendi ka njoftuar tashmë disa ndryshime që planifikon të bëjë në Akt.

Ndryshimi i parë që Gjermania synon të bëjë në përpjekje për të nxitur emigracionin e punëtorëve të kualifikuar nga jashtë është ta bëjë Kartën Blu më të aksesueshme për një gamë më të gjerë specialistësh që kanë një diplomë universitare.

Po ashtu qeveria e Gjermanisë dëshiron të lejojë shtetasit e vendeve të treta të punojnë në Gjermani në fushën e tyre të ekspertizës pa u kërkuar të kalojnë procedurat formale të njohjes së kualifikimit dhe diplomës së tyre profesionale.

Për të huajt që duan t’u njihen kualifikimet pasi të jenë në Gjermani, qeveria synon t’u mundësojë nisjen e procesit pas mbërritjes së tyre.

Qeveria kërkon gjithashtu të lejojë të huajt të hyjnë në vend me qëllim të gjetjes së një pune.

Çka do të thotë se Gjermania dëshiron të lërë të huajt që nuk kanë gjetur punë të lëvizin fillimisht dhe më pas të gjejnë një vend pune.

Marrë nga “Schengen Visa Info”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.