Shqipëria është mundur minimalisht 0-1 nga Gjeorgjia në ndeshjen e dytë të UEFA Nations League 2024-25 në Ligën B1.
Kuqezintjë pritën Gjeorgjinë në stadiumin “Air Albania”, Tiranë, në atë që ishte një kështjellë e pamposhtur në epokën e trajnerit Sylvinho.
Ishte një duel interesant ku dy ekipet vinin të motivuara nga fitore në ndeshjet e para, përkatësisht Shqipëria fitoi 2-1 ndaj Ukrainës, ndërsa Gjeorgjia triumfoi 4-1 ndaj Çekisë.
Pavarësisht fitores së miqëve, ndeshja tregoi se një barazim do të ishte rezultati më i mirë për atë çfarë skuadrat dhuruan në fushë.
Vlen të theksohet fakti se kuqezinjtë bënë një ndeshje me nivel të lartë edhe pse ishin të pasaktë në tentativat për të shqetësuar portierin mik, Giorgi Mamardashvilli.
Goli i vetëm i sfidës erdhi në minutën e 71 me autor, Giorgi Kochorashvili, i cili realizoi pas një gjuajtje nga distanca, duke mos i lënë mundësi reagimi Thomas Strakoshës.
Strakosha, megjithatë, ishte në nivelin e duhur teksa bëri dy pritje të jashtëzakonshme disa minuta më vonë.
Ndeshja e sotme ishte dueli numër 16-të mes Shqipërisë dhe Gjeorgjisë. Kuqezinjtë kanë fituar tre, barazuar katër dhe humbur nëntë. Ndërkohë, kanë pësuar 24 gola dhe kanë shënuar 13.
Fitorja e fundit e kuqezinjëve ndaj gjeorgjianëve daton më 4 qershor 2005, ndeshje kualifikuese për Kupën e Botës, 3-2, me golat e Igli Tares (dy) dhe Ervin Skelës. Dhe, do të duhet të presim ndeshjen e kthimit, më 14 tetor, për të parë nëse Shqipëria do të mund të thyejë akullin për një fitore.
Duelin e sotëm ekipet e nisën me formacionet:
Shqipëria: Strakosha; Hysaj, Ismajli, Kumbulla, Mitaj; Ramadani, Asllani; Asani, Hoxha, Bajrami; Manaj.
Gjeorgjia: Mamardashvili; Gvelesiani, Kashia, Dvali; Kakabadze, Chakvetadze, Kochorashvili, Kiteishvili, Lochoshvili; Mikautadze, Kvaratskhelia.
Për kuqezinjtë u aktivizuan gjatë pjesës së dytë Qazim Laçi, Taulant Seferi, Sebastjan Spahiu dhe Myrto Uzuni. Për Spahiun kjo ishte ndeshja debutuese me fanellën e ekipit kombëtar.
Kujtojmë se Shqipëria vinte në këtë përballje pa kapitenin Berat Gjimshiti, sulmuesin Armando Broja dhe anësorin Arbnor Muçolli. Të tre të dëmtuar. Mirlind Daku mungoi gjatë këtij grumbullimi pasi vuajti pezullimin nga UEFA për ngjarjet gjatë Euro 2024.
Lojtari i ndeshjes
Autori i golit të vetëm të ndeshjes, Kochorashvili, ishte lojtari më i dalluar i ndeshjes në “Air Albania”.
Gjatë 89 minutave në fushën e blertë, gjeorgjiani pati 104 prekje të topit, saktësi pasimi 93 për qind, një gol, një gjuajtje jashtë kuadratit dhe një gjuajtje të bllokuar. Ai fitoi shtatë nga 10 duelet në fushë
Përsa i përketë ekipit kuqezi, lojtarët më të spikatur ishin Ylber Ramadani, Kristjan Asllani dhe Mario Mitaj. Megjithatë, në përgjithësi, ekipi pati paraqitje të kënaqëshme.
Situata në Ligën B1
Me fitoren e arritur në Tiranë, Gjeorgjia kryeson Ligën B1 me 6 pikë të plota. Shqipëria dhe Çekia kanë nga 3 pikë. Ukraina qëndron në fund pa pikë.
Çekia mundi mbrëmjen e kësaj të marte Ukrainën 3-2 në Pragë.
Ndeshjet e radhës në Nations League do të jenë në tetor, pra pas gati një muaji. Në raundin e tretë, më 11 tetor, përballen Ukrainë – Gjeorgji dhe Çeki – Shqipëri. Në raundin e katërt, më 14 tetor, vijnë duelet Gjeorgji – Shqipëri dhe Ukrainë – Çeki.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
