Shoqata Sindikale e Anëtarëve të Shërbimit të Jashtëm të Kosovës, konsideron se aktualisht në Ministrinë e Punëve të Jashtme dhe Diasporës (MPJD), është “gjendje alarmante”.
Nga kjo shoqatë janë përmendur disa nga veprimet që kanë ndodhur brenda MPDJ-së.
“Ministrja ka lëshuar vendime sporadike për përfundim mandati, ndërprerje mandati para afatit të përcaktuar ligjor apo transferim nga një mision në tjetrin pa asnjë bazë ligjore”.
“Sipas shoqatës, në të njëjtën kohë, disa të tjerë i mban nëpër misione me dy e më shumë mandate apo ka dërguar në mision jashtë vendit pa e kaluar së paku periudhën kohore të përcaktuar me ligj të shërbimit në MPJD dhe pa gradë diplomatike”, thuhet në një komunikat dërguar mediave.
Sipas tyre, nga ky dikaster është bërë shkelje e legjislacionit në fuqi, Kushtetutës, ligjeve dhe akteve të tjera nënligjore nga udhëheqësit kryesorë të MPJD-së.
“Ilir Muçaj u instalua në pozitën e zëvendësuesit të sekretarit të përgjithshëm, zyrtar i sapotransferuar në MPJD në pozitën e udhëheqësit të Divizionit (një nivel më ulët se pozita e drejtorit të Departamentit) nga Zyra e Kryeministrit ku mbajti pozitën shef i Divizionit për Energji, Mjedis dhe Transport. Edhe paraardhësi z. Behar Isma kishte qenë shef i Divizionit në ish-Ministrinë e Diasporës para se të emërohej në pozitën e zëvendësuesit të sekretarit të përgjithshëm në MPJD”, thuhet në komunikatë.
Nga SHSASHJ, është thënë se i gjithë ky proces është zhvilluar nën masa të rrepta të fshehtësisë.
“Komisioni për grada dhe disiplinë kërkohet që të mblidhet dy herë në vit, por nuk është thirrur për vite të tëra. Një numër i konsiderueshëm i diplomatëve janë në prag të përfundimit të mandatit të tyre në misione me grada të njëjta, disa janë pranë pensionimit e disa të tjerëve nuk iu është dhënë asnjëherë mundësia për të shërbyer jashtë vendit në mungesë të gradave”, theksohet në komunikatë.
Në komunikatë theksohet se ministrja muajve të fundit ka lëshuar vendime sporadike për përfundim mandati, ndërprerje mandati para afatit të përcaktuar ligjor apo transferim nga një mision në tjetrin pa asnjë bazë ligjore.
“Tanimë është bërë e pamundur të planifikohet jeta e një diplomati dhe familjarëve të tyre me të gjitha këto lëvizje dhe në kundërshtim të praktikave ndërkombëtare”.
Shoqata si shqetësuese e ka ngritur edhe çështjen e menaxhmentit të MPJD-së që po refuzon zbatimin e vendimeve të KPMSHCK-së dhe të gjykatave të Kosovës, duke përfshirë edhe vendimet e Gjykatës së Apelit dhe Gjykatës Kushtetuese.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
