Këtë të diele janë bërë gjashtë vjet nga vdekja e legjendës së futbollit të Kosovës dhe presidentit legjendar të Federatës së Futbollit, Fadil Vokrri, i cili kishte ndërruar jetë pas një sulmi në zemër.
Në këtë përvjetor, Vokrrin e ka përkujtuar Federata e Futbollit të Kosovës, duke shkruar se 9 qershori i vitit 2018 mbetet datë që sjellë ndjesi nostalgjie, por edhe krenarie për trashëgiminë e pasur që Vokrri la te të gjithë ata që e adhuruan, por edhe patën fatin ta njohin nga afër dhe të punojnë me të.
“Fadil Vokrri ishte një futbollist i jashtëzakonshëm dhe i përmasave botërore. Talentin që ia dhuroi Perëndia, ai e shndërroi në pasion dhe dashuri të pakufishme për lojën magjike të futbollit. Me aftësitë e tij të shkëlqyeshme me topin, intuitën për gol dhe stilin unik, Vokrri u shqua që në rininë e tij të hershme. Me paraqitjet në fanellën e Prishtinës, ai bëri që një popull i tërë ta thërriste emrin e tij dhe tek ai të shihte shpresën e gëzimin”.
Sipas FFK-së, karriera e Vokrrit e ndritur, brenda dhe jashtë vendit, e bëri atë një nga figurat më të dashura dhe të respektuara në historinë e sportit tonë.
“Ardhja e tij ishte shpresë, teksa misioni i përbashkët ishte anëtarësimi në UEFA e FIFA. Ndonëse ky rrugëtim nuk ishte i lehtë, autoriteti dhe këmbëngulësia e tij, por edhe i të gjithë atyre që ishim pjesë e Federatës, si dhe mbështetja e institucioneve vendore dhe faktorëve ndërkombëtarë, bëri që ky mision të përmbyllej suksesshëm në maj të vitit 2016.
Tutje, FFK-ja thotë se Fadil Vokrri ishte simbol uniteti për futbollin, derisa trashëgimia që la pas është një thesar i paçmuar. T
“Teksa nderojmë Legjendën tonë, ne i jemi mirënjohës për gjithçka që bëri për futbollin në Kosovë. Të frymëzuar nga trashëgimia e tij do të vazhdojmë të punojmë me përkushtim për një të ardhme të ndritur për brezat e rinj, me besim të plotë se vendi ynë do të japë edhe shumë talente si ai”.
Ndryshe, nën udhëheqjen e Fadil Vokrrit, FFK-ja u pranua në UEFA dhe FIFA, pasi një beteje të jashtëzakonshme e pengesave të mëdha nga Serbia, Vokrri ia kishte dalur ta ndërkombëtarizonte futbollin kosovar.
Vokrri, u lind më 23 korrik të vitit 1960 në Podujevë, dhe njihej si “Diego Maradona” shqiptar, për shkak të stilit të lojës, ndërkaq me futboll ishte marrë që nga mosha 15-vjeçare, ndërsa dy vjet më pas debutoi në KF Llapi në Podujevë.
Gjatë karrierës së tij, Vokrri ishte luajtur për Prishtinën, Partizanin e Beogradit, Nimes-in e Francës, Fenerbahçen e Turqisë dhe përfaqësuesen e ish-Jugosllavisë ku në vitin 1987 ishte shpallur edhe lojtari më i mirë.
Prej vitit 2008, ishte në pozitën e Kryetarit të Federatës së Futbollit të Kosovës dhe e drejtoi FFK-në në pranimin me të drejta të plota në UEFA e FIFA.
Tash Federatën e Futbollit të Kosovës e udhëheqë Agim Ademi, i cili ishte nënkryetar kur kishte ndërruar jetë Fadil Vokrri gjashtë vite më parë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
