Gërvalla: Nuk i besoj dialogut të udhëhequr nga Lajçak

Ministrja e Punëve të Jashtme dhe Diasporës (MPJD), Donika Gërvalla, ka thënë se nuk i beson dialogut që ndërmjetësohet nga Miroslav Lajçak.

“Jo, nuk i besoj dialogut të ndërmjetësuar nga Lajçak. Kam arsye për të mos i besuar këtij dialogu, pasi që Lajçak ka dhënë argumente të mjaftueshme për të treguar se është shumë i njëanshëm në këtë proces”, ka thënë Gërvalla në një intervistë për “KTV”.

Mirëpo, sipas saj, Lajçak është vetëm një zyrtar i BE-së, i cili, thekson ajo, “pagën e merr për një kohë të caktuar për t’u angazhuar në këtë proces. Lajçak do të shkojë dhe do të vijë tjetri, prandaj ne duhet të zgjedhim se kujt i besojmë në procese të tilla”.

“Ne i besojmë Shteteve të Bashkuara të Amerikës, ne i besojmë Gjermanisë, ne i besojmë Mbretërisë së Bashkuara”, shtoi.

“Rrjedha që ka marrë dialogu i udhëhequr nga Lajçak, dhe ne e kemi vënë në pah këtë që nga viti 2021… e kam shfrytëzuar secilin rast që kam pasur me kolegët e mi dhe përfaqësues të tjerë të politikës së jashtme ndërkombëtare për të treguar që ne kemi shumë shqetësime lidhur me këtë proces”.

Prandaj, potencoi ajo, “zyrtarët shkojnë e vijnë, partneritetin kryesor Kosova e ka me SHBA-në, me BE-në – shtetet anëtare – dhe me Mbretërinë e Bashkuar”.

Gërvalla gënjen publikisht, thotë se në Bruksel “nuk është diskutuar për dinarin”

Ndonëse të martën në Bruksel, kryenegociatori i Kosovës, Besnik Bislimi, në takimet që pati me kryenegociatorin serb, Petar Petkoviç, dhe të Dërguarin Special të Bashkimit Evropian për dialogun Kosovë-Serbi, Miroslav Lajçak, diskutuan për dinarin serb, pas vendimit të Bankës Qendrore të Kosovës për ndalimin e kësaj valute për pagesa në territorin kosovar, Ministrja e Punëve të Jashtme dhe Diasporës (MPJD), Donika Gërvalla, ka gënjyer duke thënë se në Bruksel nuk është diskutuar çështja e dinarit.

Këto komente, Gërvalla i ka bërë në një intervistë për “KTV”, derisa po fliste me ndryshimet e ekzekutivit në lidhje me vendimin për dianrin, pasi që të njëjtit kishin deklaruar se nuk negociojnë me Serbinë për këtë çështje.

“Në asnjë moment, asnjë përfaqësues i institucioneve nuk e diskuton çështjen e dinarit, çështjen e euros, as në Bruksel as dikund tjetër”, deklaroi Gërvalla.

“Në asnjë moment”, insistoi ajo, “përfaqësuesit e Kosovës nuk negociojnë në Bruksel çështjen e legjitimitetit e vendimit të BQK-së rreth dinarit”.

“Çfarë është diskutuar ndër të tjera edhe në Bruksel, por shumë më pak në Bruksel sesa në vende të tjera, është tema a ka masa të fazës së tranzicionit të cilat mund të prekin qytetarët e Kosovës, të cilët për shkak të një faze kalimtare shumë të shkurtër mund të kenë pasoja të caktuara për shkak të të ardhurave që nuk mund t’i kenë më”, shtoi.

Madje, ajo theksoi se “nuk është negociuar për asnjë lloj alternative ndaj vendimit dhe rregullores së BQK-së, asnjë lloj negociate nuk ka pasur rreth asaj”.

“Jo, nuk ka negociata, ka bisedime edhe me Serbinë rreth asaj se cila mund të jetë faza e tranzicionit sesi mundet mjetet financiare të cilat në formë të ndihmës financiare kanë ardhur nga Serbia me thasë, me vetura pa asnjë kontroll, cilat mund të jenë mënyrat që ato mjete mund të arrinë në të njëjtin destinacion, por duke mos shkelur rregullat dhe ligjet e kushtetutën e vendit tonë”.

Kjo është një bisedë, në vlerësimin e ministres, “e cila duhet zhvilluar edhe me Serbinë, por pa negociuar në asnjë sekondë dhe në asnjë moment as legjitimitetin dhe as vlefshmërinë e asaj që ka vendosur BQK-ja”.

Gërvalla: Politika e vendeve të Unionit s’bëhet në Bruksel, por në kryeqytetet e BE-së

Ministrja e Punëve të Jashtme dhe Diasporës (MPJD), Donika Gërvalla, ka thënë se politika e jashtme e vendeve anëtare të Bashkimit Evropian nuk bëhet në Bruksel, pra kryeqendrën evropiane, por, sipas saj, në kryeqytetet e Unionit.

Këto komente, Gërvalla i bëri në një intervistë për “KTV”, kur po fliste se pse ende nuk janë larguar masat ndëshkuese të BE-së ndaj Kosovës – të vendosura në qershor për shkak të refuzimit të qeverisë për ta shtensionuar situatën në Veri – ku tha se nuk ka pasur unitet brenda Unionit për vendosjen e këtyre masave.

“Fakti që ato masa u morën shpejt e shpejt me email, tregon që nuk ka pasur një unitet në mesin e shteteve anëtare të BE-së për marrjen e atyre masave”, tha Gërvalla.

Kryediplomatja kosovare theksoi se “nuk kemi informacion se kur do të hiqen” masat.

“Nuk kemi asnjë analizë të Brukselit, prandaj dua të bëjë një dallim shumë të qartë ndërmjet Brukselit dhe shteteve anëtare të BE-së, nuk kemi një analizë dhe një kërkesë të saktë të BE-së se çfarë duhet të bëjë Kosova që ato masa duhet të hiqen”, shtoi.

Pas kësaj, ndërhyri gazetari i cili ia rikujtoi Gërvallës se Brukseli e ka një politikë të jashtme që udhëhiqet nga Josep Borrell, dhe një për dialogun Kosovë-Serbi, që udhëhiqet nga Miroslav Lajçak, dhe se të njëjtit kanë mbështetjen nga vendet e BE-së, por edhe nga Shtetet e Bashkuara të Amerikës.

Mirëpo, një vlerësim i tillë, sipas ministres është “totalisht i gabuar”.

“Në Bruksel është e vërtetë që e kemi përfaqësuesin për Politikë të Jashtme Borrell, e kemi një person që merret me negocimin e dialogut mes Kosovës dhe Serbisë, mirëpo politika e jashtme e shteteve anëtare të BE-së bëhet në kryeqytetet e BE-së, dhe nuk bëhet në Bruksel, dhe këtë e tregon edhe fakti sesi shtetet anëtare të BE-së vazhdimisht, shikoni në raport me Ukrainën… janë vazhdimisht kryeqytetet që e thonë fjalën vendimtare dhe jo Borrelli”, mendon ajo.

Edhe pas kësaj, gazetari insistoi se Gjermania dhe Franca, si dy vendet më të fuqishme të bllokut evropian, i kanë dhënë mbështetje në të gjitha deklaratat dhe qëndrimet e Borrell-it dhe Lajçak-ut në raport me Kosovën, por – përsëri – ministrja nuk u pajtua tërësisht.

“Unë do thoja që është e vërtetë që shpesh e kanë thënë, por nuk do të thoja se e kanë thënë gjithmonë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.