Gërvalla njoftoi hapjen e “një zyre të re” para vitit të ri – AP kupton se bëhet fjalë për Vatikanin

Vëtëm disa ditë pas njoftimit pompoz të ministres së Punëve të Jashtme dhe Diasporës (MPJD), Donika Gërvalla-Schwarz, mbi hapjen e “një zyre të re” në një vend shumë të rëndësishëm para përmbylljes së vitit 2023 ose në fillim të vitit 2024, burime të Albanian Post brenda MPJD-së bëjnë të ditur se bëhet fjalë për hapjen e një zyre ndërlidhëse në Selinë e Shenjtë.

Kosova shumë shpejt do ta hapë një zyrë në Vatikan, rreth pesëmbëdhjetë vjet pas shpalljes së pavarësisë. Burime të Albanian Post brenda MPJD-së bëjnë të ditur se udhëheqës i zyrës ndërlidhëse pritet të emërohet ish-këshilltari në Presidencën e Kosovës, Vehbi Miftari, i cili aktualisht shërben si përfaqësues për kontakte në kuadër të Ambasadës së Kosovës në Itali.

Ky vend ende nuk e ka njohur pavarësinë e Kosovës, ndonëse shteti kosovar ka përfaqësuesin e vet dhe kërkesa për njohje ekziston prej kohësh në Vatikan. Megjithatë, në Selinë e Shenjtë nuk kanë munguar as takimet e herëpasherëshme të Papa Françeskut apo të Sekretarëve të Shtetit me zyrtarë të lartë kosovar, përfshirë kryeminstra, ministra e presidentë të Kosovës.

Hapja e zyrës në Selinë e Shenjtë do të ishte një ndër të arriturat më të mëdha të Kosovës në arenën ndërkombëtare në vitet e fundit dhe sigurisht, një ndër punët më të vyera të shefes së diplomacisë kosovare. Në rast se realizohet premtimi i kryediplomates kosovare, atëherë kjo do të përbënte njëkohësisht aktivitetin e vetëm kontret të ministres Gërvalla.

Lajmi për hapjen e zyrës ndërlidhëse në Vatikan vjen në një kohë kur Kosova është duke hasur në vështirësi të jashtëzakonshme sa i përket forcimit të subjektivitetit ndërkombëtar, posaçërisht pas fushatës agresive të Serbisë. Pesë shtete brenda Bashkimit Evropian (BE) – Spanja, Greqia, Rumania, Sllovakia dhe Qipro – refuzojnë njohjen e pavarësisë së Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.