Ministrja e Punëve të Jashtme dhe Diasporës (MPJD), Donika Gërvalla, është takuar këtë të diel me disa deputetë gjerman, të cilët i ka njoftuar për “ndryshimet thelbësore” në komunat Veriore, përkatësisht Leposaviq, Mitrovicë të Veriut, Zveçan dhe Zubin Potok – të banuara me shumicë serbe.

Lajmi u bë i ditur përmes një komunikate nga MPJD, të cilët njoftuan se në qendër të diskutimit në mes të deputetëve gjermanë dhe kryediplomates kosovare ka qenë anëtarësimi në Këshillin e Evropës (KiE).

“Në margjinat e Konferencës së Sigurisë në Mynih, Zëvendëskryeministrja dhe Ministrja e Punëve të Jashtme dhe Diasporës e Republikës së Kosovës, Donika Gërvalla, takoi një grup të deputetëve gjermanë, të cilët i informoi rreth proceseve politike në vend, situatën e sigurisë dhe ndryshimet thelbësore në komunat Veriore, rezultatet e qeverisjes së mirë dhe prioritetet e politikës së jashtme të Republikës së Kosovës”, thuhet në njoftim.

Gjatë takimit me deputetët, Niels Annen (SPD), Ulrich Lechte (FDP), Thomas Erndl (CDU/CSU), Andreas Schwarz dhe Armand Zorn (SPD) si dhe Alexander Müller (FDP), Ministrja Gërvalla i falënderoi ata për mbështetjen ndaj Kosovës, duke theksuar se “Gjermania është partnere e fuqishme e Kosovës dhe mbështetja e saj për Kosovën në proceset euroatlantike është thelbësore për paqen dhe stabilitetin e Ballkanit Perëndimor”.

Në margjinat e Konferencës së Sigurisë, Gërvalla, është takuar të shtunën edhe me homologen e saj nga Bullgaria, Mariya Gabriel, me të cilën kanë diskutuar për koordinimin në proceset euroatlantike.

Siç ka njoftuar MPJ, takimi mes kryediplomates kosovare dhe asaj bullgare ka filluar me urimin për qytetarët e Kosovës me rastin e 16 vjetorit të pavarësisë.

“Në rrafshin e marrëdhënieve të fuqishme bilaterale mes dy shteteve, Ministrja Gërvalla dhe homologia e saj Gabriel diskutuan mbi thellimin e bashkëpunimit në shumë fusha me interes të përbashkët, duke përfshirë shkëmbimet tregtare, zhvillimin e bujqësisë si dhe mbështetjen e Kosovës në rrugën e saj të integrimit në mekanizmat euroatlantik”, thuhet në njoftim.

Aty shtohet se situata në Ballkanin Perëndimor dhe nevoja e ndërmarrjes së hapave konkret në ruajtjen e paqes dhe stabilitetit në rajon ishte gjithashtu pjesë e rëndësishme e diskutimit në takimin dy palësh.

Hovenier: Jemi të frustruar me Kurtin, raportet tona veçse janë afektuar – kush thotë ndryshe, thjesht nuk po thotë të vërtetën