Gërvalla: Ende asnjë pasojë ndaj Serbisë për sulmin në Banjë

Ministrja e Punëve të Jashtme dhe Diasporës, Donika Gërvalla-Schwarz, gjatë një takimi me kongresistin amerikan, Keith Self, veçoi faktin që ende nuk ka asnjë pasojë për Serbinë pas sulmit terrorist në Banjë të Zveçanit – komunë e banuar me shumicë serbe – në pjesën veriore të Kosovës, derisa në takim u prek edhe çështja e kërcënimeve të vazhdueshme të Serbisë e Rusisë.

Në një komunikatë për shtyp, diplomacia kosovare njoftoi se gjatë takimit Gërvalla-Self të enjten në Uashington, kryediplomatja adresoi edhe mungesën e pasojave ndaj Serbisë për sulmin e dhunshëm të protestuesve serbë ndaj ushtarëve të misionit të NATO-s në Kosovë (KFOR) vitin e kaluar.

“Gjatë këtij takimi Ministrja Gërvalla e njoftoi kongresistin Self lidhur me kërcënimet e vazhdueshme të Serbisë ndaj Kosovës duke përmendur faktin që ende nuk ka asnjë pasojë për Serbinë pas sulmit në Banjskë, sulmit ndaj KFOR-it dhe veprimeve të vazhdueshme agresive por edhe vendosmërinë e Republikës së Kosovës për t’i qëndruar besnike parimeve të saj”.

Duke njoftuar kongresistin Self për progresin e vendit të vogël ballkanik në shumë fusha, thuhet më tej, shefja e diplomacisë kosovare falënderoi Shtetet e Bashkuara të Amerikës (SHBA) për mbështetjen e vazhdueshme në çlirimin, shtetndërtimin, zhvillimin dhe integrimet euroatlantike të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.