Gërvalla e vlerëson si “kapitull të ri” heqjen e vizave nga Izraeli: Vendimi hyn në fuqi nga 19 shtatori

Ministrja e Punëve të Jashtme dhe Diasporës, Donika Gërvalla, e ka vlerësuar si kapitull të ri heqjen e vizave nga Izraeli për Kosovën, teksa ka bërë të ditur se vendimi do të hyjë në fuqi nga 19 shtatori.

“Qytetarët e Republikës së Kosovës nga 19 shtatori i këtij viti mund të udhëtojnë pa viza edhe në Izrael, kjo falë marrëveshjes që sot nënshkruam me Ministrin e Brendshëm të Izraelit, Moshe Arbel, pas takimit dypalësh që patëm paraprakisht”, ka shkruar Gërvalla në rrjetin social ‘Facebook’.

Ndër të tjera, ka potencuar se do të ketë bashkëpunim dhe zhvillim ekonomik mes të dyja vendeve.

“Kjo marrëveshje që nënshkruam dhe ky vendim për heqjen e vizave për qytetarët e dy vendeve tona është edhe një hap më shumë në fuqizimin e pasaportës së Republikës sonë dhe një kapitull i ri në promovimin e shtetit tonë, bashkëpunimin dhe zhvillimin ekonomik, zhvillimin arsimor të të rinjve si dhe realizimin e projekteve dhe iniciativave të përbashkëta mes qytetarëve dhe vendeve tona në të ardhmen”.

Të martën është nënshkruar marrëveshja për heqjen e vizave nga Izraeli për shtetasit e Kosovës.

Kjo marrëveshje u nënshkrua mes ministres së Punëve të Jashtme dhe Diasporës, Donika Gërvalla dhe ministrit të Brendshëm të Izraelit, Moshe Arbel.

Prej 1 janarit, shtetasit e Kosovës me pasaporta biometrike janë në gjendje të udhëtojnë lirshëm në shtetet e zonës Schengen, pas hyrjes në fuqi të vendimit për liberalizimin e vizave.

Që nga 5 janari, kosovarëve iu mundësua ta vizitojnë edhe Spanjën pa viza.

Liberalizimi i vizave u mundëson qytetarëve të Kosovës, që kanë pasaporta biometrike, të qëndrojnë deri në 90 ditë – brenda gjashtë muajsh – në cilindo nga 27 shtetet anëtare të zonës Schengen.

Udhëtimet pa viza shërbejnë për vizita turistike, çështje familjare ose të ngjashme.

Megjithatë, liberalizimi i vizave nuk nënkupton leje pune apo përfitime të tjera.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.