Ministrja e Punëve të Jashtme e Kosovës, Donika Gërvalla, është takuar me homologun e saj nga Turqia, Hakan Fidan.
Sipas njoftimit për media të MPJ-së, Gërvalla ka diskutuar me Fdianin për mbështetjen e Turqisë ndaj Kosovës për anëtarësim në Këshillin e Evropës, në NATO dhe organizata tjera ndërkombëtare dhe fuqizimin e bashkëpunimit në shkëmbime tregtare dhe investime strategjike.
Tutje Gërvalla e njoftoi ministrin Fidan rreth prioriteteve të Republikës së Kosovës në proceset integruese dhe fuqizimin e subjektivitetit ndërkombëtar.
Po ashtu sipas njoftimit, gjatë këtij takimi bilateral u diskutua edhe rreth sigurisë në rajon dhe nevojën e rritjes së bashkëpunimit multilateral në tejkalimin e sfidave të përbashkëta me të cilat po përballen shtetet demokratike.
Dy ditë më parë, Gërvalla pati theksuar në Forumin që u mbajt në Antali se do të kërkojë nga nivelet e larta ruajtjen e stabilitetit dhe paqes në Kosovë.
“Në Antali do të diskutojmë për disa nga sfidat më urgjente të sigurisë së sotme dhe duke eksploruar zgjidhje paqësore gjatë kësaj periudhe të trazuar”.
“Në takimet e nivelit të lartë do të theksoj nevojën për veprim për të ruajtur paqen dhe stabilitetin në Kosovë dhe në Ballkanin Perëndimor”, ka shkruar ajo në rrjetin social ‘X’.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
